“Шакар еманг, асал енг”: Сурхондарё вилояти ҳокимининг гапи муҳокамаларга сабаб бўлди
Мазкур ҳолат юзасидан вилоят ҳокими матбуот котиби расмий муносабат билдирди.
Сурхондарё вилояти ҳокими Улуғбек Қосимовнинг одамлар тонналаб шакар еётгани ҳақидаги видеоси тарқалиб, кенг муҳокамаларга сабаб бўлди. Вилоят ҳокими матбуот котиби Муродбек Давлатов вазият юзасидан расмий муносабат билдирди.
Маълум қилинишича, 11 апрель куни ўтказилган йиғилишда мактабгача таълим муассасалари, шифохоналар, спортчилар ва ҳарбий қисмларга озиқ-овқат етказиб берувчи корхоналар фаолияти муҳокама қилиниб, вилоят ҳокими томонидан масъуллар ва таъминотчи корхоналар раҳбарларига шакар ўрнига табиий асал ва мевалардан олинган маҳсулотлардан кенгроқ фойдаланиш бўйича берилган тавсиялар нотўғри талқин қилинган ҳолда тарқатилган.
“Кечагина олимни олиб келиб, шакарнинг зарарини ўргаттирдим. Ҳамма тонналаб шакар еяпти. Биз ҳозир 1000 тонна шакарнинг Сурхондарёдаги импортини қисқартирсак, шакарнинг бозордаги нархи арзон бўлади. Нима учун 3000 тонна асал ишлаб чиқаряпмиз? Нега, асал емаймиз биз?”, деган ҳоким тарқалган видеода.
Хабарларга кўра, ижтимоий тармоқ фойдаланувчилари ҳокимнинг гапларига турлича муносабат билдирган. Айримлар асал шакардан қимматлиги, айни дамда 1 кило тоза асал пулига 8-10 кило шакар беришини айтган.
Матбуот котиби ҳокимнинг тавсиялари, аввало, болалар, беморлар, спортчилар ва ҳарбий хизматчилар саломатлигини муҳофаза қилиш, соғлом овқатланишни кенг жорий этиш, шунингдек, ҳудудда етарли миқдорда мавжуд бўлган асал ва бошқа табиий маҳсулотлардан самарали фойдаланиш мақсадида билдирилганини қайд этган. Шу билан бирга, шакарнинг инсон саломатлигига салбий таъсири илмий жиҳатдан асослангани алоҳида таъкидланган.
Шу муносабат билан ҳокимлик матбуот котиби айрим канал ва саҳифа админларидан маълумотларни умумий мазмундан узиб олиб, нотўғри талқин қилган ҳолда тарқатмасликларини сўраган.
