“Қаҳрамонимизсан, шуни билгин”: Мирзиёев Синдаровни тарихий ғалаба билан табриклади

Ўзбекистон Президенти Шавкат Мирзиёев шахмат бўйича FIDE Номзодлар турнири ғолиби Жавоҳир Синдаров билан телефон орқали суҳбатлашди.

 

Давлат раҳбари ёш гроссмейстерни Ўзбекистон шахмат тарихида илк бор ушбу нуфузли мусобақада зафар қозониб, тарихий натижага эришгани билан самимий табриклади. 

 

Суҳбат давомида Синдаровнинг турнирда юқори даражадаги ўйин намойиш этиб, 13 партияда 6 та ғалабага эришгани спорт оламида кам учрайдиган натижа экани таъкидланди. Президент Синдаровнинг дунёнинг етакчи шахматчиларига қарши баҳсларда жасорат, юқори маҳорат, кучли ирода ва интеллектуал салоҳият намоён этганини қайд этди. 

 

Президент Синдаровни “қаҳрамон” дея таърифлаб, йил охирида бўлиб ўтадиган жаҳон тожи учун баҳсда ҳам ғалаба қозонишига ишонч билдирди ва унга омад тилади. Давлат раҳбари спортчининг ота-онаси, яқинлари ҳамда мураббийларини ҳам ушбу тарихий ғалаба билан табриклади.

 

Ўз навбатида, Синдаров билдирилган эътибор ва самимий тилаклар учун Президентга миннатдорлик изҳор этди.

 

Маълумот учун, Синдаров аввалроқ 2025-йилги FIDE Жаҳон кубогида эришган ғалабаси учун “Ўзбекистон Республикасида хизмат кўрсатган спортчи” фахрий унвони билан тақдирланган. 

 

Шунингдек, унга Президент совғаси сифатида уч хонали хонадон топширилган, мураббийлари эса пул мукофотлари билан рағбатлантирилган.

 

Номзодлар турнири ғолиби сифатида Синдаров амалдаги жаҳон чемпиони Гукеш Доммаражу га қарши жаҳон тожи учун баҳс олиб бориш ҳуқуқини қўлга киритди. Турнирнинг аниқ санаси ва ўтказилиш жойи кейинроқ FIDE томонидан эълон қилинади.