Намангандаги тиббиёт муассасаларида истеъмолчилардан 300 миллион сўм асоссиз олинган
Нархномада кўрсатилган, аммо амалда ишлатилмаган материаллар учун ҳам фуқаролардан тўлов ундирилган.
Наманган вилоятидаги қатор тиббиёт муассасаларида истеъмолчилардан асоссиз ундирилган қарийб 300 миллион сўм маблағни қайта ҳисоб-китоб қилиш бўйича кўрсатма берилди. Бу ҳақда Рақобат қўмитаси хабар берди.
Маълум қилинишича, текширувлар Рақобат қўмитасининг Наманган вилояти ҳудудий бошқармаси томонидан Соғлиқни сақлаш вазирлиги тизимидаги Тўрақўрғон, Уйчи, Учқўрғон, Чортоқ ва Янгиқўрғон туман тиббиёт бирлашмаларида ўтказилган.
Ўрганишлар давомида тиббиёт муассасаларида қўлланилаётган ўлчаш ва синаш воситалари белгиланган муддатларда метрологик кўрикдан ўтказилмагани ҳолда беморларга хизмат кўрсатилгани аниқланган. Шунингдек, нархномада кўрсатилган, аммо амалда ишлатилмаган материаллар учун ҳам фуқаролардан тўлов ундирилган.
Натижада, тиббиёт бирлашмалари томонидан қарийб 300 миллион сўм миқдорида асоссиз даромад олингани маълум бўлди.
Мазкур ҳолат юзасидан ҳудудий бошқарманинг махсус комиссияси томонидан “Истеъмолчиларнинг ҳуқуқларини ҳимоя қилиш тўғрисида”ги Қонун ҳамда Вазирлар Маҳкамасининг соҳада хизмат кўрсатиш тартибини белгиловчи қарорлари талаблари бузилгани бўйича иш қўзғатилган.
Ишни кўриб чиқиш якунларига кўра, тиббиёт муассасаларига истеъмолчилардан асоссиз ундирилган маблағларни белгиланган тартибда қайтариш юзасидан мажбурий кўрсатмалар берилди.
