Трамп Исроилга Ливанга ҳужум қилишни таъқиқлади

 

АҚШ президентининг маълум қилишича, Исроил Ливанга қарши ҳарбий зарбаларни тўхтатади. У бу қарор АҚШ томонидан тегишли тақиқ қўйилгани билан боғлиқлигини таъкидлаб, «етар» деган мазмунда қатъий позиция билдирган. Ушбу баёнот Трампнинг Truth Social ижтимоий тармоғидаги саҳифасида эълон қилинган.

 

Маълумот учун, бир кун аввал АҚШ президенти Исроил ва Ливан ўртасида 10 кунлик сулҳга эришилганини маълум қилган эди.

 

Шунингдек, Трамп Эрон билан боғлиқ масалаларга ҳам тўхталиб, аввалги ҳарбий зарбалар оқибатида юзага келган ядровий хавф билан боғлиқ ҳудудларни тозалаш жараёнлари АҚШ иштирокида амалга оширилишини билдирган.

 

Унинг қайд этишича, Эрон Ҳормуз бўғозини ёпмасликка рози бўлган ва ушбу стратегик йўналиш эндиликда глобал савдога қарши «қурол» сифатида ишлатилмайди. Трамп, шунингдек, бўғозни миналардан тозалаш жараёнида Америка кучлари иштирок этишини ҳам таъкидлаган.

 

Оқ уй раҳбари Эрон бўйича келишув Ливан масаласига алоқадор эмаслигини айтган ҳолда, АҚШ “Ливанни қайта тиклаш” бўйича ҳам ташаббусларни давом эттиришини билдирган.

 

Аввалроқ Исроил ва Ливан ўртасида 1993 йилдан буён илк бор юқори даражадаги музокаралар ўтказилгани ва бу жараён Вашингтон воситачилигида амалга оширилгани қайд этилган эди.