АҚШда футболчи Лионел Месси фирибгарликда айбланмоқда
Бунга ўтган йилнинг октябрь ойида Венесуэла терма жамоасига қарши ўйинда футболчининг қатнашмагани ва промоутерлик компаниясининг зарар кўргани сабаб бўлган.
Интер Маями клуби ва Аргентина миллий жамоаси ҳужумчиси Лионел Мессига нисбатан фирибгарлик бўйича айблов қўйилди. Бу ҳақда TmzSports хабар берди.
Нашрга кўра, VID промоутерлик компанияси Лионел Месси ва Аргентина Футбол Ассоциацияси (АФА)га қарши кўп миллионли даъво аризаси билан судга мурожаат қилган. Бунга ўтган йилнинг октябрь ойида Венесуэла терма жамоасига қарши ўтказилган, реклама қилинган ўртоқлик учрашувида футболчи иштирок этмагани учун компания зарар кўргани сабаб бўлган.
Маълум қилинишича, шартномага мувофиқ, Месси жароҳати бўлмаган тақдирда камида 30 дақиқа майдонда ҳаракат қилиши керак эди. Бироқ, у ўша ўйинда ҳеч қандай жароҳати бўлмаса ҳам, майдонга тушмаган.
Даъво суммасининг аниқ миқдори ҳозирча ошкор қилинмаган.
Маълумот учун, Месси 2023 йилдан бери Интер Маями сафида тўп сурмоқда.
