Россияга кираётган ва ундан чиқаётган шахсларнинг гаджетлари текширилиши мумкин
Талабларга риоя этмаганлар жарима ёки 15 суткагача маъмурий қамоқ жазосига тортилади.
Россияда давлат чегарасидан ўтишда назорат тартиблари кучайтирилди. Бу “Россия Федерациясининг Давлат чегараси тўғрисида”ги федерал қонунга киритилган ўзгартиришлар кучга киргани билан боғлиқ, дея хабар бермоқда “Вести” нашри.
Янги тартибга кўра, чегара хизмати ходимларига шахслар ва транспорт воситаларини текшириш бўйича кенгайтирилган ваколатлар берилди. Эндиликда мамлакатга кираётган ва ундан чиқаётган фуқароларнинг мобил телефонлари, планшетлари, ноутбуклари ва бошқа электрон қурилмалари ҳам кўздан кечирилиши мумкин.
Маълум қилинишича, агар давлат чегараси режимини бузиш ёки тақиқланган буюмларни ноқонуний олиб ўтиш ҳолатларига шубҳа туғилса, чегара ходимлари қурилмаларни тақдим этишни талаб қилиш ҳамда уларнинг ичида сақланган маълумотларни визуал текширувдан ўтказиш ҳуқуқига эга.
Қонунчилик талабларига риоя этмаслик 5 мингдан 7 минг рублгача жарима ёки 15 суткагача маъмурий қамоқ жазоси билан якунланиши мумкин.
Расмийларга кўра, мазкур чоралар терроризм ва экстремизмга қарши курашиш, контрабанда ва ноқонуний миграцияни чеклаш ҳамда давлат чегараси хавфсизлигини мустаҳкамлашга қаратилган.
