Apple компанияси раҳбари ўзгаради

Технология гиганти Apple компанияси 2026 йил 1 сентябрдан бошлаб бош ижрочи директор лавозимига Жон Тернус тайинланишини эълон қилди. Ҳозирги CEO, 15 йилдан буён компанияни бошқариб келаётган Тим Кук эса ижрочи раис лавозимига ўтади.

 

Компания баёнотига кўра, Тернус айни пайтда Аpple'да аппарат воситалари ишлаб чиқиш бўйича катта вице-президент сифатида фаолият юритмоқда. У янги лавозимда компаниянинг стратегик ривожи ва маҳсулот сиёсатини бошқаради.

 

Тим Кук ўз баёнотида Аpple'ни бошқариш унинг ҳаётидаги энг катта шараф бўлганини таъкидлади. У 2011 йилда компания асосчиларидан бири Стив Жобс ўрнини эгаллаган эди.

 

Раҳбарият алмашинуви ҳақидаги хабар фонд бозори савдолари якунлангач эълон қилинди. Постмаркет савдоларида Apple акциялари 0,86 фоизга пасайиб, бир дона учун 270,7 долларни ташкил этди.

 

Аввалроқ Financial Times нашри компания 2026 йилнинг биринчи ярмида янги CEO ҳақида эълон қилиши мумкинлигини ёзган эди. Таҳлилчиларга кўра, бу қарор янги раҳбарга компаниянинг асосий йиллик тадбирлари — июндаги ишлаб чиқувчилар конференцияси ва сентябрдаги iPhone тақдимотига тайёргарлик кўриш имконини беради.

 

Маълумот учун, Тим Кук 1998 йилдан буён Аpple'да ишлаб келади. Кук бош директор лавозимида ишлаган даврда компаниянинг бозор капитали 2011 йилдаги тахминан 350 миллиард доллардан 2026 йил 20 апрель ҳолатига кўра 4 триллион доллардан ошди.