Болгария ва Исроилга ишга юбориш билан боғлиқ ноқонуний ҳолатлар аниқланди
Фуқаролардан Болгарияга юбориш учун 3 минг доллар, Исроилга юбориш учун 20 минг доллар сўралган.
Навоий ва Қашқадарё вилоятларида чет элга ишга юборишни ваъда қилиб, фуқароларни алдаган шахслар қўлга олинди. Бу ҳақда ДХХ маълум қилди.
Қайд этилишича, Навоий шаҳрида фаолият юритувчи сайёҳлик фирмаси раҳбари Хатирчи туманида яшовчи 2006 йилда туғилган фуқаронинг ишончига кириб, уни Болгарияга ишга жўнатиш учун барча ҳужжатларни тайёрлаб беришини айтган. У хизматлари эвазига 3 минг АҚШ доллари олган вақтида ашёвий далиллар билан ушланган.
Шунингдек, Қашқадарё вилоятининг Китоб туманида ҳам шу каби ҳолат аниқланган. Тошкент вилоятида яшовчи 1997 йилда туғилган шахс икки нафар фуқарони Исроилга ишга юбориш ва ишчи визасини танишлари орқали расмийлаштириб беришни ваъда қилган. У бу хизматлар учун 20 минг АҚШ доллари талаб қилган. Тезкор тадбир давомида у сўралган маблағнинг 5 минг АҚШ долларини олган вақтида қўлга олинган.
Ҳар икки ҳолат юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
Мутасаддилар фуқароларни чет элга ишга жўнатиш бўйича ижтимоий тармоқларда тарқалаётган таклифларга нисбатан эҳтиёткор бўлишга чақирди. Шунингдек, фақат Вазирлар Маҳкамаси ҳузуридаги Миграция агентлиги ёки тегишли лицензияга эга хусусий бандлик агентликлари орқали мурожаат қилиш тавсия этилмоқда.
