Россия армиясига ёлланган ўзбекистонликлар сони қарийб 4,9 мингга етди

2026 йил ҳолатига кўра, Украинага тегишли “Хочу жить”(Яшашни хоҳлайман) лойиҳаси Россия Мудофаа вазирлиги билан шартнома имзолаган ва Россия армияси сафида жанг қилган ёки қилаётган Марказий Осиё давлатлари фуқароларининг 12 666 нафари бўйича шахсий маълумотларга эгалигини маълум қилди. Бу маълумотлар “Украина — Марказий Осиё” сўровига жавобан тақдим этилган.

 

Россия сафида рўйхатга олинган аскарларнинг энг кўпи Ўзбекистонга тўғри келади. Лойиҳа мамлакатнинг 4 853 нафар фуқароси шахсини аниқлаган.

 

Шунингдек, Россия ҳарбий кучларида 3 407 нафар Тожикистон фуқароси, 2 389 нафар Қозоғистон фуқароси ёлланма жангчи сифатида хизмат қилаётгани аниқланган.

 

Тўртинчи ўринда Қирғизистон - камида 1439 нафар. Энг кам кўрсаткич Туркманистон фуқаролари орасида қайд этилган - 578 нафар.

 

"2025 йил баҳор ва ёз ойларида “Хочу жить” лойиҳаси Россиянинг Украинага қарши урушига жалб этилган Марказий Осиё фуқароларининг исм-шарифлари келтирилган рўйхатларни эълон қилган эди. Ўша пайтда лойиҳа ходимларида 5 740 нафар ёлланма жангчи ҳақида маълумот мавжуд бўлган. Шундай қилиб, аниқланган шахслар сони икки баробардан кўпроққа ошган", дейилади хабарда.

 

Эслатиб ўтамиз, Жиноят кодексига мувофиқ, чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш жавобгарликка сабаб бўлади.