Трамп Эрон билан келишув имзоланишида иштирок этиши мумкин — Reuters
Музокараларнинг навбатдаги босқичи 22 апрелга режалаштирилган.
Reuters агентлиги манбаларига кўра, АҚШ президенти Дональд Трамп АҚШ ва Эрон ўртасида эҳтимолий тинчлик келишуви имзоланиш маросимида шахсан ёки онлайн форматда иштирок этиши мумкин.
Агентлик хабарида таъкидланишича, Вашингтон ва Теҳрон ўртасидаги музокаралар давом этмоқда ҳамда навбатдаги учрашув 22 апрель кунига режалаштирилган. Манбаларга кўра, жараён бўйича муҳим силжишлар кузатилмоқда.
The Wall Street Journal ва Axios нашрлари маълумотига кўра, икки давлат музокараларнинг навбатдаги босқичи учун Покистонга делегациялар юборишга келишиб олган.
Аввалроқ АҚШ ва Эрон делегациялари ўртасидаги музокараларнинг биринчи босқичи 11 апрель куни Исломобод шаҳрида бўлиб ўтган эди. Учрашув қарийб 24 соат давом этган.
АҚШ делегациясига вице-президент Ж.Д. Венс бошчилик қилган бўлса, Эрон томонига парламент раиси Муҳаммад Боғир Ғолибоф ҳамда ташқи ишлар вазири Аббос Ароқчи вакиллик қилган.
