“Синовсиз 3-курсга киритиб қўямиз”: вазирлик ўқишга қабул қилишдаги фирибгарликдан огоҳлантирди

 

Таълим ва илм-фан вазирлиги фуқароларни олий таълим муассасаларига ўқишга қабул қилиш ва ўқишни кўчириш билан боғлиқ фирибгарлик ҳолатларидан эҳтиёт бўлишга чақирди.

 

Бунга Наманган вилоятида аниқланган ҳолат сабаб бўлган. Ижтимоий тармоқларда Бош прокуратура ҳузуридаги Иқтисодий жиноятларга қарши курашиш департаментининг вилоят бошқармаси томонидан ўтказилган тезкор тадбирда фуқарони хусусий университетнинг 3-курсига киритиб қўйишни ваъда қилиб, бунинг эвазига 18 миллион сўм талаб қилган шахс пулни олаётган вақтида қўлга олингани ҳақида хабар берилди. Мазкур ҳолат юзасидан жиноят иши қўзғатилган.

 

Вазирлик маълумотига кўра, хорижий ва нодавлат олий таълим ташкилотларидан ўқишни кўчириш учун аризалар ҳар йили 15 июлдан 5 августга қадар Билим ва малакаларни баҳолаш агентлигининг махсус электрон платформаси орқали қабул қилинади. Кўчириш жараёни Агентлик ўтказадиган махсус синовлар натижаларига кўра амалга оширилади.

 

Шунингдек, нодавлат олий таълим ташкилотларига қабул қилинган талабалар ҳақидаги буйруқлар 1 октябрдан кечиктирмай HEMIS тизимида рўйхатдан ўтказилиши шарт. Белгиланган тартибга мувофиқ, ушбу тизимга киритилмаган шахсларга диплом шакллантирилмайди.

 

Шу сабабли вазирлик фуқароларни “синовсиз 3-курсга киритиб қўямиз”, “ўқишни муддатидан кейин кўчириб берамиз” ёки “ҳужжатларни кейин расмийлаштирамиз” каби ваъдаларга ишонмасликка чақирди.

 

Шунингдек, фуқароларга ўқишга қабул қилиш ва ўқишни кўчиришда фақат расмий платформалардан фойдаланиш, талабалик маълумотлари HEMIS тизимида рўйхатдан ўтказилганини текшириш ҳамда ҳужжат ва маблағларини воситачиларга бермаслик тавсия этилди.

 

Шубҳали таклифлар ёки қонунбузилиш ҳолатлари ҳақида Коррупцияга қарши курашиш агентлигининг 1253 ёки вазирликнинг 1006 қисқа рақамлари орқали хабар бериш мумкин.