Eron minalar sabab Hormuz bo‘g‘ozini to‘liq ocholmayapti — The New York Times
Bo‘g‘ozda ko‘plab minalar koordinatalari qayd etilmasdan o‘rnatilgani aytilmoqda.
Eron Hormuz bo‘g‘ozida o‘rnatilgan minalarni aniqlash va zararsizlantirishdagi qiyinchiliklar sabab dengiz yo‘lini to‘liq ocholmayapti. Bu haqda The New York Times AQSh rasmiylariga tayanib xabar berdi.
Qayd etilishicha, Islom inqilobi qo‘riqchilari korpusi (IIQK) mart oyida AQSh va Isroil tomonidan harbiy harakatlar boshlanganidan ko‘p o‘tmay kichik kemalar yordamida bo‘g‘ozni minalagan. Bu esa mintaqada kema qatnovining to‘xtashiga hamda jahon energiya resurslari narxining keskin oshishiga olib kelgan. Bo‘g‘oz orqali o‘tish faqat Rossiya va Xitoy kabi do‘st davlatlar kemalari hamda boj to‘lashga rozi bo‘lganlar uchun ochilgan.
The New York Times xabariga ko‘ra, IIQK Hormuz bo‘g‘ozidan o‘tish uchun “xavfsiz yo‘laklar” xaritasini tarqatgan. Biroq bu xaritalarning aniqligi shubha ostida. Ko‘plab minalar tartibsiz ravishda va koordinatalari qayd etilmasdan o‘rnatilgan, ayrim portlovchi qurilmalar esa ataylab erkin suzishga qo‘yib yuborilgan. Bu esa ularni aniqlash va zararsizlantirishni murakkablashtiradi.
AQSh rasmiylari nashrga bergan intervyusida dengiz minalarini zararsizlantirish ularni o‘rnatishdan ancha murakkab jarayon ekanini ta’kidlagan. Ularning aytishicha, na AQSh, na Eron minalarni tezkor zararsizlantirish uchun yetarli darajada kuchli texnikaga ega emas. AQSh harbiylarida faqat mina qo‘riqchilari bo‘lgan qirg‘oq kemalari mavjud, Eron kuchlari esa hatto o‘z o‘q-dorilarini ham tezda zararsizlantirish imkoniyatiga ega emas.
Hormuz bo‘g‘ozi strategik jihatdan muhim yo‘nalish bo‘lib, u orqali dunyo neftining qariyb 15 foizi va suyultirilgan tabiiy gazning 20 foizi tashiladi.
AQSh Eron tomondan dengiz yo‘lini to‘liq ochishni talab qilmoqda, aks holda harbiy harakatlar qayta boshlanishi mumkin. Eron va AQSh delegatsiyalari muzokara o‘tkazish uchun Islomobodga yetib borgan. Hozirda bilvosita uchrashuvlar bo‘lib o‘tgan.
