АҚШдаги радио дастурда Ҳиндистон “дўзах”га қиёсланди

Ҳиндистон АҚШ президенти Доналд Трамп томонидан улашилган ва мамлакатни “дўзахга ўхшаш жой” (hellhole) деб таърифлаган фикрларни “асоссиз” деб баҳолаб, уларни ноўрин ва икки давлат ўртасидаги мустаҳкам муносабатларга мос келмаслигини билдирди. Бу ҳақда Reuters хабар берди.

 

Маълум қилинишича, мазкур фикрлар консерватив шарҳловчи Майкл Савеж томонидан The Savage Nation радио дастуридаги чиқишида айтилган. Трамп ушбу дастур стенограммасини пайшанба куни ўзининг Truth Social саҳифасида ҳеч қандай, тушунтиришларсиз жойлаштирган.

 

Стенограммага кўра, Савеж шундай деган: “Бу ерда туғилган бола дарҳол фуқаро бўлади, кейин эса бутун оиласини Хитойдан, Ҳиндистондан ёки сайёрадаги бошқа ъдўзахга ўхшашъ жойлардан (Америкага) олиб келади.”

 

У, шунингдек, ҳозирги муҳожирлар орасида мамлакатга садоқат деярли йўқлигини, бу аввалгидек эмаслигини айтган. 

 

Трамп АҚШда туғилганлик асосида фуқаролик бериш амалиётини чеклашга қаратилган фармон чиқарган. Ушбу қарор АҚШ Олий судида кўриб чиқилмоқда. У шу ой бошида мазкур масала бўйича суд мажлисида ҳам иштирок этган.

 

Ҳиндистон Ташқи ишлар вазирлиги пайшанба куни кечқурун ушбу баёнотларга кескин муносабат билдирди. Вазирлик вакили Рандҳир Жайсвал бу изоҳларни ноўрин ва савиясиз деб атади.

 

Унинг таъкидлашича, бу фикрлар Ҳиндистон ва АҚШ ўртасидаги ўзаро ҳурмат ва умумий манфаатларга асосланган реал муносабатларни акс эттирмайди.

 

АҚШнинг Ню Делидаги элчихонаси эса президентнинг Ҳиндистонни “буюк мамлакат” сифатида баҳолаган бошқа фикрларини эслатиб ўтди.

 

Ҳиндистоннинг мухолиф “Ҳиндистон миллий конгресси” партияси мазкур баёнотни ҳақоратли деб баҳолаб, бош вазир Нарендра Модини ушбу масалани АҚШ раҳбари билан кўтаришга чақирди.

 

Маълумотларга кўра, АҚШда қарийб 5,5 миллион ҳинд келиб чиқишига эга шахслар истиқомат қилади. Ҳинд ва хитой диаспоралари мамлакатдаги энг йирик Осиё келиб чиқишидаги аҳоли гуруҳларини ташкил этади.

 

Трамп маъмурияти томонидан туғилганлик асосида фуқаролик беришни чеклаш ташаббуси илгари сурилган бўлиб, мазкур масала АҚШ Олий судида кўриб чиқилмоқда.