Фуқаронинг пластик картасидан 142 млн сўм ўғирлаган вояга етмаганлар қўлга олинди

Фуқаронинг пластик картасидаги 100 миллион сўмдан ортиқ маблағни ечиб олган киберфирибгарлар қўлга олинди. Бу ҳақда Фарғона ИИБ хабар берди.

 

Маълум қилинишича, Фарғона шаҳрида яшовчи фуқаро 2026 йил 6 февраль куни унинг банк пластик картасидан номаълум шахслар томонидан ахборот тизимидан рухсатсиз фойдаланган ҳолда 142 миллион сўм маблағ ечиб олингани ҳақида мурожаат қилган.

 

Мазкур ҳолат юзасидан 2026 йил 13 февраль куни номаълум шахсга нисбатан Жиноят кодексининг 169-моддаси 3-қисми “Б” банди билан жиноят иши қўзғатилган. Олиб борилган тезкор суриштирув тадбирлари давомида ушбу жиноятни Тошкент шаҳрида яшовчи 2008- ва 2009 йилда туғилган шахслар ўзаро тил бириктириб, бир гуруҳ бўлиб, мобил қурилмалари орқали содир этгани аниқланган.

 

Гумонланувчилар ўз кўрсатмаларида бундай ҳаракатларни бошқа такрорламасликларини билдирган. Улар бегона шахсларга верификациядан ўтиш ёки шахсий маълумотларни бериш мумкин эмаслигини, бу нотўғри йўл эканини таъкидлаб, қилган ишидан пушаймон эканини маълум қилган ҳамда келгусида бундай ҳолатларни такрорламасликка ваъда берган.

 

Тезкор тадбир давомида икки нафар шахс қўлга олиниб, улардан мобил қурилмалар далилий ашё сифатида расмийлаштириб олинган.

 

Мазкур жиноят иши юзасидан икки нафар вояга етмаган шахсга нисбатан Ўзбекистон Республикаси Жиноят кодексининг 169-моддаси 3-қисми “Б” ва “В” бандлари билан жиноят иши қўзғатилиб, қамоққа олиш тарзидаги эҳтиёт чораси қўлланилган. 

 

Ҳозирда дастлабки тергов ҳаракатлари олиб борилмоқда.