АҚШ делегацияси Эрон билан музокара ўтказиш учун Исломободга боради
Эрон ташқи ишлар вазири ҳам Покистонга етиб борган. Лекин у АҚШ президентининг вакиллари билан учрашмоқчи эмас.
АҚШ президенти Доналд Трамп ўз элчилари Стив Уиткофф ва Жаред Кушнерни Исломободда Эрон ташқи ишлар вазири Аббос Ароқчи билан музокаралар ўтказиш учун юбормоқда. Бу ҳақда Associated Press Оқ уйга таяниб хабар берди.
Оқ уй матбуот котиби Керолайн Левиттнинг Reuters агентлигига маълум қилишича, улар 25 апрель куни Покистонга жўнаб кетади. Унинг сўзларига кўра, апрелда Эрон билан музокараларнинг биринчи босқичини ўтказган АҚШ витсе-президенти Жей Ди Венс ҳам, агар Вашингтон зарур деб ҳисобласа, Исломободга бориши мумкин.
Эрон ташқи ишлар вазири эса аллақачон Покистонга етиб келган. Reuters манбаларига кўра, Ароқчи АҚШ музокарачилари билан учрашишни режалаштирмаяпти, унинг ташрифи қисқа бўлади. У Покистонга АҚШга етказилиши лозим бўлган таклифларини тақдим этмоқчи. Шундан сўнг Ароқчи Маскат (Оман) ва Москвага йўл олади.
Axios нашри журналисти Барак Равиднинг манбаларга таяниб хабар беришича, АҚШ ва Эрон музокарачилари аввал Покистон воситачилари билан алоҳида-алоҳида учрашганидан кейин ўзаро учрашув ўтказиши мумкин.
Axios манбаларига кўра, АҚШ, Эрон ва Покистон иштирокидаги уч томонлама учрашув 27 апрель куни бўлиб ўтиши кутилмоқда.
АҚШ ва Эрон 7 апрель куни 28 февралдан бери давом этаётган урушни якунлаш бўйича келишувга эришиш мақсадида вақтинчалик сулҳ тузган эди. Томонлар Исломободда биринчи босқич музокараларини ўтказган, бироқ ҳеч қандай келишувга эриша олмаган. Кейинчалик янги учрашув санаси узоқ муҳокама қилинган, бироқ Теҳрон вакиллари музокара ўтказишни рад этиб келган.
