АҚШ ва Эрон музокаралари 27 апрель куни ўтказилиши мумкин
Музокаралар олдидан Покистон воситачилигида алоҳида маслаҳатлашувлар ўтказилиши кутилмоқда.
АҚШ ва Эрон ўртасидаги эҳтимолий тўғридан-тўғри музокараларнинг янги босқичи бўйича дастлабки маълумотлар эълон қилинди.
Axios нашри журналисти Барак Равиднинг маълум қилишича, икки давлат вакиллари ўртасидаги учрашув 27 апрель куни Покистон пойтахти Исломобод шаҳрида бўлиб ўтиши мумкин. Қайд этилишича, музокаралар Яқин Шарқдаги вазиятни юмшатиш ҳамда минтақавий барқарорлик масалаларига бағишланиши кутилмоқда.
Маълумотларга кўра, эҳтимолий учрашув Эрон ташқи ишлар вазири Аббос Ароқчи ҳамда Америка томони вакиллари иштирокида ўтказилиши режалаштирилмоқда.
Шунингдек, музокаралар олдидан АҚШ президенти Доналд Трампнинг куёви Жаред Кушнер ҳамда Президентнинг махсус вакили Стив Уиткофф иштирокида Покистон воситачилигида алоҳида маслаҳатлашувлар бўлиб ўтиши мумкинлиги билдирилган.
Аввалроқ Эрон томони Вашингтон билан музокараларда ён бермаслигини маълум қилгани, шунингдек айрим таклифлар рад этилгани ҳақида ҳам хабарлар тарқалган эди.
