АҚШда Британия Қироли ташрифи чоғида адашиб Австралия байроқлари илинди
Қиролни кутиб олиш учун шаҳарга 230 дан ортиқ байроқ ўрнатилган бўлиб, улар орасида Австралия байроқлари ҳам бўлган.
АҚШ пойтахти Вашингтонда Британия қироли Чарлз III нинг ташрифи олдидан тайёргарлик жараёнида байроқлар билан боғлиқ хатолик кузатилди. Бу ҳақда Reuters хабар берди.
Маълум қилинишича, Колумбия округи расмийлари Оқ уй яқинига ўрнатилган байроқлар орасида Буюк Британия рамзлари ўрнига тасодифан Австралия байроқларини жойлаштириб қўйган. Вашингтон Транспорт департаменти вакили ушбу хато тез орада аниқланиб, бартараф этилганини билдирган.
Расмийларга кўра, қиролни кутиб олиш учун шаҳарга 230 дан ортиқ байроқ ўрнатилган бўлиб, улар орасида 15 та Австралия байроғи ҳам бўлган. Кейинчалик улар Британия байроқлари билан алмаштирилган.
Таъкидланишича, қирол Чарлз айни пайтда Австралиянинг ҳам давлат раҳбари ҳисобланади, бироқ бу мақом фақат рамзий аҳамиятга эга холос.
Қирол Чарлзнинг АҚШга давлат ташрифи мамлакат мустақиллигининг 250 йиллиги муносабати билан амалга оширилмоқда ва у ҳукмронлик давридаги энг муҳим ташрифлардан бири сифатида баҳоланмоқда.
Сафар доирасида икки давлат ўртасидаги “махсус муносабатлар”ни мустаҳкамлаш масалалари муҳокама қилиниши кутилмоқда. Сўнгги йилларда Эрон билан боғлиқ можаро фонида бу алоқалар сезиларли даражада совуқлашгани қайд этилмоқда.
