Халқаро биология олимпиадаси: 100 га яқин иқтидорли ёш куч синашмоқда

Айни дамда Наманганда Абу Али ибн Сино номидаги халқаро биология олимпиадаси бўлиб ўтмоқда. 

 

 

Унда дунёнинг 12 та мамлакати — Туркия, Таиланд, Малайзия, Россия, Озарбайжон, Беларус, Мўғулистон, Қозоғистон, Қирғизистон, Тожикистон, Туркманистон давлатларидан келган ҳамда Ўзбекистон вакилларидан иборат, жами 94 нафар ўқувчи-ёшлар иштирок этмоқда. 

 

Қайд этилишича, бундан кўзланган мақсад — буюк аждодларнинг жаҳон цивилизацияси ривожига қўшган улкан ҳиссасини халқаро миқёсда кенг тарғиб қилиш, иқтидорли ўқувчиларни қўллаб-қувватлашдан иборат. 

 

 

15-18 ёшли ўсмирлар ўртасида ўтказилаётган Абу Али Ибн Сино номидаги халқаро биология олимпиадаси 2 турда ташкил этилади.

 

 

Бунда 1-тур лаборатория (назарий) шаклида, 2-тур ёзма иш (назарий) шаклида ўтказилади. Якуний натижаларга кўра ғолиб ва совриндор, деб топилган жамоа вакиллари олтин, кумуш, бронза медаллари, диплом ва эсдалик совғалари билан тақдирланади.

 

 

Олимпиада доирасида ўқувчи-ёшлар учун халқаро мутахассислар иштирокида бир қатор маҳорат дарслари ўтказилди. Бундан ташқари, олимпиада иштирокчилари ва меҳмонлар учун Наманганнинг тарихий ва маданий обидаларига саёҳатлар ташкил этилди. 

 

 

Мазкур олимпиада биология фани бўйича жорий йилнинг июль ойида  Литвада ўтказиладиган Халқаро биология олимпиадасига навбатдаги тайёргарлик босқичи бўлиб хизмат қилади.

 

Маълумотларга кўра, бу йил иккинчи марта ўтказилаётган мазкур олимпиада илк бора 2024 йилнинг 9-14 июнь кунлари Бухорода бўлиб ўтган.

 

Унда ўзбекистонлик ўқувчилар 12 та (3 та олтин, 3 та кумуш, 6 та бронза) медални қўлга киритган.