Сўнгги ўн йилликда очарчилик қурбонлари сони 9 баравар кўпайди — БМТ
2025 йилда дунёнинг 47 мамлакат ва ҳудудида 266 миллион киши ўткир озиқ-овқат танқислигига дуч келган.
Бирлашган Миллатлар Ташкилоти агентликлари томонидан тайёрланган 2026 йилги Озиқ-овқат инқирози бўйича глобал ҳисоботда дунёда очарчилик даражаси кескин ёмонлашаётгани қайд этилди.
Ҳисоботга кўра, 2016 йилдан буён ҳалокатли даражадаги очликка дуч келаётган инсонлар сони тўққиз баравар ошган. Шу билан бирга, ўткир озиқ-овқат танқислиги ҳолатлари ҳам сўнгги ўн йилликда икки баравар кўпайган.
2025 йилда ҳисобот тарихида илк бор бир вақтнинг ўзида икки ҳудудда — Ғазо сектори ҳамда Суданнинг айрим қисмларида ҳалокатли очарчилик даражаси расман эълон қилинган.
БМТнинг Интеграциялашган озиқ-овқат хавфсизлиги таснифи тизимига мувофиқ, мазкур ҳудудлардаги вазият энг юқори — бешинчи босқич сифатида баҳоланган. Ушбу даража аҳолининг оммавий гуманитар ёрдамга муҳтожлигини англатади.
Ҳисоботда қайд этилишича, Афғонистон, Бангладеш, Конго Демократик Республикаси, Мянма, Нигерия, Покистон, Жанубий Судан, Судан, Сурия ва Яман давлатлари ўткир очарчилик хавфи юқори бўлган асосий ҳудудлар сирасига киради. Мазкур мамлакатларда дунёдаги очликдан азият чекаётган аҳолининг қарийб учдан икки қисми яшайди.
2025 йилда 47 та мамлакат ва ҳудудда жами 266 миллион киши юқори даражадаги озиқ-овқат хавфсизлиги муаммосига дуч келган. Бу таҳлил қилинган умумий аҳолининг қарийб 23 фоизини ташкил этади.
Шунингдек, болалар ўртасидаги тўйиб овқатланмаслик муаммоси ҳам жиддий тус олган. Ҳисоботга кўра, 2025 йилда 35,5 миллион бола ўткир тўйиб овқатланмасликдан азият чеккан бўлса, шундан қарийб 10 миллион нафари оғир ҳолатда бўлган.
