Вашингтонда Трамп иштирок этган тадбирда отишма юз берди
АҚШ президенти, биринчи хоним Мелания Трамп, вице-президент Ж.Д. Вэнс ва бошқа амалдорлар эвакуация қилинган.
Вашингтонда АҚШ президенти Дональд Трамп иштирок этган расмий тадбир вақтида хавфсизлик билан боғлиқ фавқулодда ҳолат юз берди. Бу ҳақда BBC хабар берди.
Оқ уй мухбирлари уюшмасининг анъанавий қабул маросими давомида отишма овозларига ўхшаш товушлар эшитилгач, юқори мартабали амалдорлар зудлик билан эвакуация қилинган.
Маҳаллий ОАВ маълумотларига кўра, воқеа Washington Hilton меҳмонхонасида ўтказилаётган тадбир чоғида содир бўлган. Ҳодисадан сўнг Махфий хизмат ходимлари президент Дональд Трампни саҳнадан олиб чиқиб кетган.
Расмий манбаларга таяниб хабар қилинишича, Дональд Трамп жароҳат олмаган ва унинг соғлиғи жойида.
Тадбирда иштирок этган вице-президент Ж.Д. Вэнс ҳам хавфсиз ҳудудга олиб чиқилган.
Шунингдек, биринчи хоним Мелания Трамп, мудофаа вазири Пит Хегсет ҳамда бошқа юқори мартабали расмийлар ҳам зудлик билан эвакуация қилинган.
Воқеадан кейин тадбир тўхтатилган ва кейинга қолдирилган. Ҳуқуқни муҳофаза қилувчи органлар томонидан бир гумондор қўлга олингани айтилмоқда. Ҳодиса сабаблари юзасидан тергов ҳаракатлари олиб борилмоқда.
