Андижонда аттракцион қулади: жароҳатланганлар бор
Бахтсиз ҳодиса сабаблари ҳақида маълумот берилмади.
Андижон вилоятидаги З.М.Бобур номидаги (“Боғишамол”) истироҳат боғида занжир узилиб кетиши натижасида, ичида одамлар бўлган аттракцион қулаб тушди. Ижтимоий тармоқлар ҳодисадан кейин аттракцион қисмлари ерда сочилиб ётгани акс этган видеолар тарқалди.
Вилояти ФВБ маълум қилишича, 26 апрель куни ушбу боғ ҳудудида аттракционлардан бирининг темир конструкцияси синган. ФВБ хабарида 2 нафар фуқаро енгил тан жароҳати олгани ва уларга малакали тиббий ёрдам кўрсатилгани билдирилган.
Бироқ, тасдиқланмаган манбаларга кўра, ҳодиса натижасида камида 7 киши жароҳатланган. Шунингдек, тармоқларда аттракционларга чиқишда ҳушёрликка чақириб, уларнинг кўплари текширувдан ўтказилмагани айтилмоқда.
Андижон вилояти ФВБ бахтсиз ҳодиса сабаблари ҳақида маълумот бермаган.
