Хоразмда юздан ортиқ муаммоли масала ҳал этилди — Саида Мирзиёева
Саида Мирзиёева Президентнинг вилоятни ижтимоий ривожлантиришга қаратилган қарорлари ижросини ўрганмоқда.
Саида Мирзиёева Хоразм вилоятига ташриф буюриб, Президент томонидан ҳудудни ижтимоий ривожлантиришга қаратилган қарорлар ижроси билан танишилаётганини маълум қилди.
Қайд этилишича, ўрганишлар давомида юздан ортиқ муаммоли масала қисқа муддатда ҳал этилган. Шу билан бирга, объектларнинг сони ва кўламидан қатъи назар, уларнинг ҳар бири алоҳида, синчковлик билан ва якунига қадар назорат қилиниши таъкидланди.
Ташриф доирасида Хонқа туманидаги мукаммал таъмирталаб 2-сонли мактаб ҳамда қаровсиз қолиб, авария ҳолатига келган 49-сонли мактабгача таълим муассасаси кўздан кечирилди.
Шунингдек, Давлат хореография академиясининг Урганч филиалидаги шароитлар ҳам ўрганилди. Ҳозирда ўқув аудиториялари ва бўлажак тарбияланувчилар учун мўлжалланган мактаб-интернат бир бинода фаолият юритаётгани қайд этилди.
Келгусида қўшимча бино қурилиб, ҳар бир муассаса учун алоҳида ва замонавий шароитлар яратилиши режалаштирилган.
