Президент Шавкат Мирзиёев Қўқон шаҳридаги “Янги Ўзбекистон” массиви билан танишди
Массив қурилиши учун жами 1,8 триллион сўмдан ортиқ маблағ йўналтирилган. Ҳудудда 25 минг нафар аҳолига мўлжалланган яхлит инфратузилма шакллантирилмоқда.
Президент Шавкат Мирзиёевнинг Фарғона вилоятига ташрифи Қўқон шаҳридаги “Янги Ўзбекистон” массивида амалга оширилаётган бунёдкорлик ишлари билан танишишдан бошланди. Бу ҳақда Президент ахборот хизмати хабар берди.
Маълум қилинишича, мамлакатда аҳолининг яшаш шароитини яхшилаш, замонавий шаҳарсозлик андозаларини ҳудудларга олиб киришга алоҳида эътибор қаратилмоқда. Бу борада жойларда барпо этилаётган “Янги Ўзбекистон” массивлари халқ фаровонлигини оширишга қаратилган йирик ижтимоий лойиҳалардан бири бўлмоқда.
Қадимий Қўқон шаҳрида қад ростлаётган янги массив ҳам нафақат уй-жой мажмуаси, балки ҳудуднинг иқтисодий ва ижтимоий қиёфасини ўзгартирувчи замонавий марказ сифатида шаклланмоқда.
Қўқон азалдан аҳоли зич яшайдиган, тадбиркорлик ривожланган шаҳарлардан бири. Шу боис, бу ерда турар жойга бўлган талаб йил сайин ортиб бормоқда. Эскирган инфратузилма ва чекланган яшаш майдонлари шаҳарни янги асосда кенгайтиришни тақозо этмоқда.
Қайд этилишича, Президентнинг икки йил аввал Фарғона вилоятига ташрифи давомида берилган топшириқлари асосида бунёд этилаётган мазкур массив айнан шу эҳтиёжга амалий ечим бўлмоқда. Бу ерда оилалар замонавий ва барча қулайликларга эга хонадонлар билан таъминланмоқда.
Массивни барпо этиш учун жами 1 триллион 850 миллиард сўм маблағ йўналтирилган. Ҳудудда 25 минг нафар аҳоли яшашига мўлжалланган яхлит инфратузилма шакллантирилмоқда. 84 та кўп қаватли уй билан бирга замонавий мактаблар, мактабгача таълим ташкилотлари, олий ўқув юрти, бизнес ва савдо марказлари ҳамда аҳоли дам олиши учун боғлар барпо этилиши кўзда тутилган.
Бу ишлар янги массив аҳолиси учун уйидан узоқлашмаган ҳолда ишлаш, таълим олиш, савдо ва хизматлардан фойдаланиш, мазмунли ҳордиқ чиқариш имкониятини яратади.
Бугунги кунда лойиҳанинг биринчи босқичи муваффақиятли якунланди, 4 минг 394 та хонадондан иборат 56 та ўн қаватли уй фойдаланишга топширилди. Тайёр таъмирли хонадонлар аҳолига 35 фоизлик бошланғич тўлов асосида, йиллик 16 фоиз ставка билан 20 йил муддатга берилмоқда.
Давлат раҳбари янги хонадонлардан бирига кириб, яратилган шароитлар ва жиҳозланиши билан танишди. Массивнинг ижтимоий аҳамиятига алоҳида тўхталиб, бу ерда шаклланаётган янги муҳит одамларнинг дунёқараши, ҳаёт сифати ва турмуш маданиятини юксалтиришга хизмат қилиши кераклигини таъкидлади.
Фарғоналик нуронийлар билан самимий суҳбат бўлиб ўтди. Улар ижтимоий давлат тамойили асосида жойларда инсон манфаатлари таъминланаётгани, замонавий таълим ва тиббиёт муассасалари, обод маҳаллалар, янги корхоналар ва тадбиркорлик имкониятлари аҳоли ҳаётини ўзгартираётганини таъкидлади. Нуронийлар бу ишлар юртда тўкинлик, фаровонлик ва ижтимоий барқарорликни мустаҳкамлаётганини айтиб, давлат раҳбарига миннатдорлик билдирди.
Шу ернинг ўзида Президент “Янги Ўзбекистон” массивининг иккинчи босқичи ҳамда Қўқон шаҳрини ривожлантириш бўйича тақдимот билан танишди.
