“Навоий” чегара божхона постида зўравонлик қилган шахс 10 суткага қамалди
У ташмачилик билан шуғулланиб, фуқаролардан пул ундирган.
Ижтимоий тармоқларда кенг тарқалган ва жамоатчиликда божхона постида кўча мафияси юзага келганига доир шубҳаларга сабаб бўлган видеодаги шахс қамалди, дея хабар бермоқда Божхона қўмитаси матбуот хизмати.
Маълум қилинишича, ушбу шахс бошқа бир фуқаронинг юкини гўёки шахсий эҳтиёж ниқоби остида олиб ўтиб бериш, яъни ташмачилик қилиш эвазига дастлаб 500 минг сўм, сўнгра яна 100 минг сўм талаб қилган. Натижада ўзаро келишмовчилик юзага келиб, вазият жанжал ва ҳақорат қилишгача борган.
Ҳолат юзасидан Тошкент тумани Ички ишлар бўлими томонидан Маъмурий жавобгарлик тўғрисидаги кодекснинг 183-моддаси билан ҳужжатлар расмийлаштирилиб, суд қарорига биноан 10 сутка маъмурий қамоқ жазоси тайинланди.
Шунингдек, матбуот хизмати чегара божхона постларида хизмат фаолияти амалдаги қонунчилик талаблари асосида йўлга қўйилганини таъкидлаб, фуқароларни фирибгарларга ишонмасликка чақирди.
