44 та туман электр тармоқлари корхонаси раҳбари ишдан олинди

 

Жорий йил 24 апрель куни Президент Шавкат Мирзиёев раислигида ўтказилган видеоселектор йиғилишида энергия самарадорлигини ошириш ва электр энергияси йўқотишларини камайтириш масалалари танқидий муҳокама қилинган эди. Йиғилишда электр йўқотишлари 20 фоиздан юқори бўлган 44 та туман электр тармоқлари корхоналаридаги ҳолат кескин танқид қилиниб, бу борада масъул раҳбарларнинг жавобгарлигини кучайтириш зарурлиги таъкидланган эди. Бу ҳақда Энергетика вазирлиги матбуот хизмати хабар берди.

 

Шунингдек, йўқотишларни камайтириш, самарадорликни ошириш ҳамда тизимга ёш ва самарали кадрларни жалб этиш бўйича аниқ топшириқлар берилган эди.

 

Мазкур топшириқлар ижросини таъминлаш мақсадида “Ҳудудий электр тармоқлари” АЖда Энергетика вазири Жўрабек Мирзамаҳмудов бошчилигида танқидий йиғилиш ўтказилди.

 

Йиғилишда ҳудудий электр ва газ таъминоти корхоналари фаолияти чуқур таҳлил қилиниб, энергия йўқотишларини камайтириш, инфратузилмани модернизация қилиш ва ноқонуний ҳолатларнинг олдини олиш бўйича устувор вазифалар белгиланди.

 

Хусусан, Вазирлар Маҳкамаси ҳузуридаги Электр энергияси, нефть маҳсулотлари ва газдан фойдаланишни назорат қилиш инспекцияси томонидан олиб борилган ўрганишлар натижасида аниқланган камчиликларни бартараф этиш мақсадида ҳудудларда ишчи гуруҳлар ташкил этилди. Улар томонидан 106 мингдан ортиқ трансформатор пунктлари ўрганилиб, уларнинг 25 мингдан зиёди таъмирталаб экани аниқланди ва таъмирлаш ишлари бошланган.

 

Шунингдек, тармоқларда юкламани камайтириш, сим ва ускуналарни янгилаш, рақамлаштириш ҳамда сунъий интеллект технологияларини жорий этиш орқали тизим самарадорлигини ошириш бўйича кўрсатмалар берилди.

 

Газ таъминоти тизимидаги камчиликлар ҳам танқидий кўриб чиқилиб, “Ҳудудгаз Хоразм” филиали раҳбарини лавозимидан озод этиш бўйича топшириқ берилди.

 

Шунингдек, ёз ва куз-қиш мавсумларига пухта тайёргарлик кўриш, мавжуд муаммоларни олдиндан бартараф этиш, газ қуйиш шохобчаларини «УГаз» тизимига улаш ишларини қисқа вақтда якунлаш, газ таъминоти тизимининг барқарор ишлашини таъминлаш ҳамда аҳолига узлуксиз ва сифатли хизмат кўрсатишни йўлга қўйиш юзасидан аниқ топшириқ ва устувор вазифалар белгилаб берилди.

 

Йиғилиш якунида электр энергияси йўқотишлари 20 фоиздан юқори бўлган ҳудудлар кесимида “Ҳудудий электр тармоқлари” АЖнинг Андижон филиалидаги 14 та, Жиззах филиалидаги 7 та, Самарқанд филиалидаги 10 та, Қашқадарё филиалидаги 4 та, шунингдек Сирдарё, Тошкент ва Фарғона филиалларидаги 2 тадан туман (шаҳар) электр корхоналари раҳбарлари лавозимидан озод этилди.