Тошкент аэропортида қушлардан ҳимоя қилувчи янги интеллектуал тизим жорий этилди
Тизим сунъий интеллект ёрдамида қушларни автоматик аниқлаб, уларни ҳайдаш учун йўналтирилган овозли ва ультратовуш сигналлардан фойдаланади.
Тошкент аэропортида қушлардан ҳимоя қилувчи “АVES Airport” жорий этилди. Бу ҳақда Uzbekistan Airports хабар берди.
Маълум қилинишича, Германияда ишлаб чиқилган мазкур тизим парвозлар хавфсизлигини таъминлашнинг орнитологик соҳасидаги энг замонавий ечимлардан бири ҳисобланади.
Тизим сунъий интеллект ёрдамида юқори хавфли ҳудудлардаги қушларни автоматик равишда аниқлаш, кузатиш ва ҳайдаш функцияларини бажаради. Ва инсон омилини сезиларли даражада пасайтиради.
“Тизим” тўлиқ автоном тарзда ишлаб ҳаво кемаларининг ҳаракатига қараб мустақил равишда фаоллашади ва ўчади.
Камералар қушларни кундузи 1000 метргача, тунда эса 400 метргача бўлган масофада аниқлашга қодир ҳамда мураккаб об-ҳаво шароитларида ҳам ўз вақтида чора кўришни таъминлайди.
Қушларни ҳайдаш учун йўналтирилган овозли ва ультратовуш сигналлардан фойдаланилади. Қушлар ушбу таъсирга ўрганиб қолмаслиги учун сигналлар доимий равишда ўзгариб туради. Шу билан бирга, тизим масофа ва атроф-муҳитга қараб овоз баландлигини тартибга солади ва экотизимга салбий таъсирни камайтиради.
Бундан ташқари бир нечта қурилмалар ҳамкорликда ишлаб, қушларни хавфсиз зоналарга йўналтиради. Мутахассислар учун таҳлил ва бошқарув осон бўлиши учун тизим доимий равишда маълумотларни йиғиб боради.
Шунингдек, тизим бир вақтнинг ўзида 256 тагача қушни аниқлаш, кузатиш ва ҳайдаш имконига эга.
