Трамп Москвада бўлиб ўтадиган Ғалаба парадига таклиф қилинмади
Россия президенти матбуот котиби АҚШ президентининг парадга таклиф этилгани ҳақидаги хабарларни рад этди.
Россия президенти Владимир Путин АҚШ президенти Доналд Трампни 9 май куни Москвада бўлиб ўтадиган Ғалаба парадига таклиф қилмаган. Бу ҳақда Россия президенти матбуот котиби Дмитрий Песков ТАСС'га маълум қилган.
«Йўқ», дея қисқа жавоб берган Песков тегишли саволга изоҳ берар экан, Трампнинг парадга таклиф этилгани ҳақидаги хабарларни рад этган.
Шу билан бирга, 29 апрель куни Путин ва Трамп ўртасида телефон орқали мулоқот бўлиб ўтган. Суҳбат давомида Россия президенти Ғалаба куни муносабати билан вақтинчалик сулҳ эълон қилишга тайёрлигини билдирган. Россия президентининг халқаро ишлар бўйича ёрдамчиси Юрий Ушаковга кўра, Трамп ушбу таклифни қўллаб-қувватлаган.
Дмитрий Песков, шунингдек, Киевнинг Ғалаба кунигача сулҳ масаласига муносабати шарт эмаслигини ҳам қайд этган.
