Угом дарёси давлат гидрологик табиий ёдгорлигига айлантирилади
Угом дарёси ва унинг ҳавзасида биохилма-хилликни асраш, сув ресурсларини муҳофаза қилиш бўйича янги мастер-режа ишлаб чиқилиши режалаштирилмоқда.
Президент Шавкат Мирзиёев 30 апрель куни табиатни муҳофаза қилиш, экологик барқарорликни таъминлаш, чиқиндиларни бошқариш тизимини такомиллаштириш ҳамда муҳофаза этиладиган табиий ҳудудларни ривожлантиришга қаратилган кенг кўламли таклифлар тақдимоти билан танишди.
Тақдимотда Угом дарёсининг экологик ҳолатини тиклаш масаласи ҳам кўриб чиқилди. Таъкидланишича, дарё ва унинг ҳавзаси Угом-Чотқол миллий табиат боғи таркибидаги муҳим экологик ҳудудлардан бири ҳисобланади. Бу ерда ўнлаб ноёб ўсимлик ва ҳайвонот турлари, шу жумладан, Қизил китобга киритилган турлар мавжуд. Дарё Чирчиқ ҳавзасининг сув таъминотида ҳам муҳим ўрин тутади. Сўнгги йилларда дарёда сув сарфи камайиб, экологик мувозанатга салбий таъсир кучайган. Бу ҳолат қирғоқларнинг емирилиши, фауна ва ўсимлик дунёсига салбий таъсир кўрсатиши, биохилма-хиллик қисқариши хавфини оширмоқда.
Шу боис, Угом дарёси ва унга туташ ҳудудларни давлат гидрологик табиат ёдгорлиги сифатида эълон қилиш, сувни муҳофаза қилиш зоналарида қурилиш ва хўжалик фаолиятини чеклаш, шунингдек, “Угом дарёси экотизимини яхшилаш” бўйича махсус мастер-режа ишлаб чиқиш таклиф этилди. Бундан ташқари, ҳудудда дарахтзорлар барпо этиш ва экологик мониторингни кучайтириш вазифалари белгиланди.
