Пентагон ёлғон маълумот бермоқда — Аббос Ароқчи
Эрон ТИВ АҚШнинг Эронга қарши уруш харажатларини 100 млрд доллар деб баҳолади.
Эрон ташқи ишлар вазири Аббос Ароқчи Қўшма Штатларнинг Эронга қарши ҳарбий операцияларга сарфлаган маблағлари ҳақидаги расмий маълумотларни танқид қилди. Унинг таъкидлашича, Пентагон эълон қилган кўрсаткичлардан фарқли равишда, ушбу харажатлар қарийб 100 миллиард долларни ташкил этган.
Вазир ижтимоий тармоқлардаги баёнотида АҚШ ҳукумати реал харажатларни камайтириб кўрсатаётганини билдириб, Исроил Бош вазири Бенямин Нетаняху сиёсатини кескин танқид қилган. Унинг фикрича, мазкур ҳарбий ҳаракатлар АҚШ учун кутилганидан анча қимматга тушган.
Ароқчи, шунингдек, билвосита иқтисодий йўқотишлар бундан ҳам юқори эканини қайд этиб, ҳар бир америкалик оила учун ўртача қўшимча харажат ойига 500 долларга етаётганини таъкидлаган.
Шу билан бирга, АҚШ расмийлари томонидан илгари сурилган маълумотларга кўра, ҳарбий операцияларга дастлабки ҳисоб-китоб асосида тахминан 25 миллиард доллар сарфланган. Бу ҳақда АҚШ Молия вазирлигининг ҳарбий котиби вазифасини бажарувчи Жюл Херст маълум қилган.
Эслатиб ўтамиз, АҚШ ва Исроил томонидан Эронга қарши ҳарбий ҳаракатлар 28 февраль куни бошланган. Кейинчалик Доналд Трамп икки ҳафталик сулҳ эълон қилган бўлсада, томонлар ўртасида узоқ муддатли келишувга эришилмаган.
