Эпштейннинг оролидаги “масжид”га Ўзбекистондан кошин олиб келинган — NYT
Эпштейн ушбу лойиҳа учун Каъбадан келтирилган кисвадан, Сурия меъморчилиги нусхасидан фойдаланган.
АҚШ Адлия вазирлиги эълон қилган ҳужжатлар америкалик молиячи Жеффрей Эпстеиннинг Яқин Шарқ билан алоқалари ва унинг шахсий оролидаги ғайриоддий иншоот ортидаги режалари ҳақида янги тафсилотларни юзага чиқарди. Бу ҳақда The New York Times хабар бермоқда.
Маълумотларга кўра, Эпштейн Кариб денгизидаги кичик Авлиё Жеймс оролида жойлашган ва узоқ вақт давомида турлича талқин қилинган бино — аслида “масжид” сифатида лойиҳалаштирилган. Кўк-оқ рангли, олтин гумбаз билан безатилган ушбу иншоот қадимги Яқин Шарқ меъморчилиги, хусусан Суриядаги ҳаммом намуналаридан илҳомланган.
Ҳужжатларда қайд этилишича, Эпштейн ушбу лойиҳани безаш учун ноёб исломий артефактларни йиққан. Жумладан, Каъбадан олинган кисва, шунингдек Ўзбекистондаги масжидлардан келтирилган безак плиткалари(кошинлар) ишлатилган. Айрим маълумотларга кўра, Каъбанинг ички ва ташқи қопламасига тегишли бўлган мато бўлаклари ҳам Эпштейн ихтиёрига берилган.
Тергов материаллари Эпштейннинг ушбу лойиҳани амалга ошириш жараёнида Яқин Шарқдаги юқори даражадаги алоқалардан фойдаланганини ҳам кўрсатади. Хусусан, у Саудия Арабистони валиаҳд шаҳзодаси Муҳаммад бин Салмон билан учрашув ўтказган ва қироллик доиралари билан яқин муносабатлар ўрнатишга ҳаракат қилган.
Шунингдек, ҳужжатларда норвегиялик дипломат Терже Род-Ларсен орқали Саудия расмийлари билан алоқалар йўлга қўйилгани қайд этилган. Эпштейн ҳатто Саудия Арабистони билан молиявий ҳамкорлик ўрнатиш ва йирик иқтисодий лойиҳаларда иштирок этишга интилган.
Экспертлар таъкидлашича, Эпштейннинг ушбу фаолияти унинг икки мақсадини — нуфузли шахслар билан алоқаларни кенгайтириш ва ноёб санъат ҳамда диний буюмлар тўпламини бойитишни — бирлаштирган.
Эслатиб ўтамиз, Жеффри Эпштейн 2019 йилда жинсий савдо айбловлари бўйича суд жараёнини кутаётган пайтда қамоқда вафот этган. Расмий ҳужжатларда у ўзини ўлдиргани қайд этилган. Мазкур янги ҳужжатлар эса унинг фаолияти ва алоқалари ҳақидаги баҳсларни яна кун тартибига олиб чиқди.
