Фарғонадаги тиббиёт техникумида аёл ўқитувчилар ўзаро жанжаллашди
Можаро натижасида бир киши жароҳат олиб, ҳодиса юзасидан суд-тиббий экспертиза тайинланган.
Аввалроқ ижтимоий тармоқларда Фарғона вилоятининг Бешариқ туманида жойлашган тиббиёт техникумида аёл ўқитувчи калтаклангани ҳақида хабарлар тарқалди. Мазкур можаро юзасидан ҳуқуқни муҳофаза қилувчи органлар томонидан текширув ишлари олиб борилди.
Вилоят ички ишлар органлари маълумотига кўра, жорий йилнинг 30 апрель куни таълим муассасасида фаолият юритувчи икки нафар аёл ўқитувчи ўртасида келишмовчилик келиб чиққан. Жанжал давомида улардан бири ҳамкасбининг бош ва кўкрак қисмига зарба бериб, тан жароҳати етказган.
Мазкур ҳолат шу куннинг ўзида Ички ишлар бошқармаси томонидан белгиланган тартибда рўйхатга олинган. Жабрланувчининг олган тан жароҳатлари даражасини аниқлаш мақсадида суд-тиббий экспертиза тайинланган.
Ҳозирда ҳодиса юзасидан терговга қадар текширув ҳаракатлари олиб борилмоқда. Вазият вилоят ИИБ томонидан назоратга олинган.
Аввалроқ, Самарқандда мактаб директори ўринбосари 9-синф ўқувчисини калтаклагани хабар берилган эди.
