Теҳрон халқаро аэропортида рейслар тикланмоқда
Ҳозирда 8 та маҳаллий авиакомпания 15 та йўналиш бўйича парвозларни амалга оширмоқда.
Теҳрондаги Имом Хомейний номидаги халқаро аэропортда тижорат рейслари қарийб икки ойлик танаффусдан сўнг босқичма-босқич қайта тикланмоқда. Бу ҳақда Al Jazeera хабар берди.
Маълум қилинишича, АҚШ–Исроил ҳарбий ҳаракатлари ортидан 58 кун давомида рейслар амалга оширилмаган.
Эрон расмийлари 25 апрелдан бошлаб ҳаво қатнови аста-секин йўлга қўйилганини билдирди. Ҳозирда 8 та маҳаллий авиакомпания 15 та йўналиш бўйича парвозларни амалга оширмоқда. Улар орасида Истанбул, Маскат, Мадина, шунингдек Хитой ва Россия йўналишлари мавжуд. Шунга қарамай, рейслар сони урушдан олдинги даражага етгани йўқ.
Урушдан аввал аэропорт кунига ўртача 150 та рейсга хизмат кўрсатган бўлса, ҳозирда терминал ҳудудларида фаоллик эндигина тикланмоқда.
Имом Хомейний аэропорт шаҳарчаси раҳбари Рамин Кашеф Азар хорижий авиакомпаниялар қайтиши сиёсий вазият ва хавфсизлик баҳосига боғлиқлигини таъкидлади.
Эрон фуқаро авиацияси маълумотларига кўра, уруш оқибатида 20 та самолёт йўқ қилинган, бироқ аэропорт инфратузилмаси деярли тўлиқ — 95 фоиз сақланиб қолган.
Эрон ҳаво ҳудуди 19 апрелдан бошлаб тўрт босқичда очилди: дастлаб транзит рейслар, кейин ички қатновлар, сўнг халқаро парвозлар тиклана бошлади. Бироқ Теҳрон ва Вашингтон ўртасидаги сиёсий кескинлик хорижий авиакомпаниялар фаолиятига ҳали ҳам таъсир кўрсатмоқда.
Аэропортлар ва авиация сектори зарар кўрди
Ҳарбий ҳаракатлар давомида Эроннинг фуқаро авиацияси тизими жиддий зарар кўрди. Расмий маълумотларга кўра, 3,3 мингдан ортиқ киши ҳалок бўлган, минглаб одамлар жароҳатланган.
Теҳрондаги Меҳробод аэропорти ҳам бир неча бор зарбага учраган. Асосан ички рейсларга хизмат қилувчи ушбу аэропорт 2009 йилгача мамлакатнинг асосий ҳаво дарвозаси бўлган. Шунингдек, Кошон, Табриз, Аҳвоз, Машҳад, Хой ва Урмия аэропортлари ҳам ҳужумлар нишонига айланган, натижада бир қатор фуқаролик самолётлари шикастланган.
Бизнес ва туризмга зарба
Парвозларнинг тўхтатилиши иқтисодиётга ҳам салбий таъсир кўрсатди. Туризм ва хизмат кўрсатиш соҳаларида фаолият кескин қисқарди, кўплаб иш ўринлари йўқотилди. Туризм соҳасида ишловчи мутахассислар даромадлар пасайгани ва оммавий қисқартиришлар юз берганини айтмоқда.
Хусусан, Наврўз байрами даврида — одатда энг гавжум мавсумда — рейсларнинг бекор қилиниши тур пакетлари, чартер қатновлар ва меҳмонхона бронларига жиддий зарба берди. Айрим компаниялар мижозларга маблағ қайтариш билан шуғулланишга мажбур бўлиб, ходимлар сонини кескин камайтирган.
Эҳтиёткор тикланиш
Мутахассислар фикрича, рейсларнинг қайта тикланиши Эроннинг глобал транспорт тизимига қайтишидан дарак беради. Бироқ сиёсий ноаниқлик ва хавфсизлик омиллари сабаб авиация сектори ҳали тўлиқ тикланганича йўқ.
Шу тариқа, аэропортлар яна фаолиятга қайтмоқда, йўловчилар оқими ортмоқда. Аммо вазиятнинг барқарорлашуви кўп жиҳатдан минтақадаги сиёсий жараёнларга боғлиқ бўлиб қолмоқда.
