Минглаб сайёҳларни жалб қилаётган Бойсун бағридаги муқаддас манзил: Хўжа Майхона ота зиёратгоҳи

Xўжа Майхона ота зиёратгоҳи Сурхондарё вилоятининг Бойсун ҳудудида, табиат бағрида жойлашган қадимий ва эъзозли масканлардан биридир. Ушбу зиёратгоҳ Хўжамайхона катта дарасида жойлашган бўлиб, унинг бағридан отилиб чиқадиган булоқ суви Мачай дарёсига бориб қўшилади.

 

 

Бу масканнинг энг диққатга сазовор жиҳати асрлар давомида бир маромда оқиб келаётган муқаддас булоқдир. Сувнинг сокин ва узлуксиз оқими бу ерга келган кишини беихтиёр ўйга толдиради. Гўё у ўз бағрида ўтмиш изларини, зиёратчиларнинг дуолари ва сукутларини асраб келаётгандек таассурот қолдиради.

 

 

 

 

Xўжамайхонага олиб борувчи йўл ҳам ўзига хос рамзий аҳамият касб этади. Бу манзиллар зиёратчилар учун нафақат тарихий, балки маънавий йўл-йўриқ вазифасини ҳам ўтайди.

 

 

Зиёратгоҳ атрофининг қалин дарахтлар билан ўралгани эса бу ерга алоҳида осойишталик бағишлайди. Булоқ суви зов тубидан чиқиб, учта табиий поғона орқали пастга оқиб тушади ва дарёга қўшилади. Ушбу манзара табиат ва муқаддаслик уйғунлашган ноёб кўриниш сифатида эътиборни тортади.

 

 

Умуман олганда, Хўжа Майхона ота зиёратгоҳи тарих, табиат ва маънавият бирлашган маскан бўлиб, у нафақат зиёрат қилиш, балки ўтмишни ҳис этиш ва руҳий осойишталик топиш учун ҳам муҳим манзил ҳисобланади.

 

 

Ҳозирги кунда ушбу зиёратгоҳга минглаб чет давлатлардан сайёҳлар ташриф буюрмоқда.