Нобел тинчлик мукофоти совриндори Наргис Моҳаммади Эрон қамоқхонасидан шифохонага ётқизилди
Инсон ҳуқуқлари фаоли ҳушидан кетиш ҳолатларидан сўнг касалхонага ётқизилган, оиласи Теҳронга кўчиришни талаб қилмоқда.
Эроннинг Занжон шаҳридаги қамоқхонада жазони ўтаётган Нобел тинчлик мукофоти совриндори, инсон ҳуқуқлари фаоли Наргис Моҳаммади соғлиғининг кескин ёмонлашиши туфайли шошилинч равишда касалхонага ётқизилди. Бу ҳақда унинг оиласи томонидан ташкил этилган Наргис Моҳаммади жамғармаси маълум қилди.
Маълумотларга кўра, 54 ёшли ҳуқуқ ҳимоячиси бир неча бор ҳушидан кетиш ҳолатларини бошдан кечирган, шунингдек, юрак фаолиятида жиддий бузилишлар қайд этилган. Қамоқхона шифокорлари унинг ҳолатини муассаса шароитида даволаш имкони йўқлигини билдирганидан сўнг, у маҳаллий шифохонага ўтказилган.
Ташкилот баёнотида таъкидланишича, Моҳаммади 140 кундан ортиқ вақт давомида зарур ихтисослаштирилган тиббий ёрдамдан маҳрум бўлган. Унинг оиласи эса уни Теҳрондаги ихтисослашган шифохонага кўчиришни талаб қилмоқда.
Шифокорлар дастлаб унинг қон босими кескин ошгани, вена ичига дори юбориш ва қўшимча муолажалар талаб этилгани ҳақида маълум қилган. Бироқ унинг аҳволи ёмонлашгани сабабли кейинчалик фавқулодда касалхонага ётқизиш қарори қабул қилинган.
Ҳозирда Наргис Моҳаммади реанимация бўлимида даволанмоқда, унинг ҳолати шифокорлар назоратида қолмоқда.
Моҳаммади аввалроқ бир неча бор қамоқ жазосига ҳукм қилинган бўлиб, у инсон ҳуқуқлари, хусусан, Эрон қамоқхоналаридаги шароитлар ва аёллар ҳуқуқларини ҳимоя қилиш бўйича фаолияти билан танилган.
