Эрон АҚШга 14 банддан иборат тинчлик режасини тақдим этди
АҚШ режа билан танишиб чиқишини, бироқ уни мақбул деб ҳисобламаслигини қайд этган.
Эрон расмийлари АҚШга можарони тугатишга қаратилган 14 банддан иборат тинчлик режасини юборди. Бу ҳақда мамлакатнинг Fars ва Tasnim ахборот агентликлари хабар берди.
Маълум қилинишича, ҳужжат Теҳрон ва Вашингтон ўртасида давом этаётган музокаралар доирасида ишлаб чиқилган бўлиб, АҚШнинг аввал тақдим этган 9 бандлик таклифига жавоб сифатида шакллантирилган. Режада можарони тугатиш бўйича асосий шартлар ва келишувга эришиш йўл харитаси акс этган.
Эрон томони икки ойлик сулҳ таклифини қўллаб-қувватламаслигини билдириб, асосий масалаларни 30 кун ичида ҳал қилиш ва вақтинчалик сулҳ ўрнига тўлиқ урушни якунлаш зарурлигини таъкидлаган.
Ҳужжатда бир қатор талаблар илгари сурилган. Хусусан, АҚШдан ҳарбий ҳаракатларни тўхтатиш, тажовуз қилмаслик бўйича кафолатлар бериш, Америка қўшинларини минтақадаги қўшни ҳудудлардан олиб чиқиш, денгиз блокадасини бекор қилиш, Эроннинг музлатилган активларини озод қилиш ҳамда санкцияларни бекор қилиш сўралган. Шунингдек, етказилган зарар учун компенсация тўлаш ва минтақадаги, жумладан Ливандаги ҳарбий ҳаракатларни тўхтатиш талаби ҳам илгари сурилган.
Бундан ташқари, Ҳормуз бўғозидаги вазиятни барқарорлаштириш бўйича алоҳида механизмлар таклиф этилган.
Қайд этилишича, мазкур ҳужжат Эрон ички идораларида барча зарур тасдиқлаш жараёнларидан ўтказилгандан сўнг, воситачи томон орқали АҚШга етказилган.
Ҳозирда Теҳрон расмийлари Вашингтоннинг расмий жавобини кутмоқда.
Дональд Трамп эса Эрон томонидан илгари сурилган шартлар қабул қилиниши эҳтимоли пастлигини билдириб, АҚШ режа билан танишиб чиқишини, бироқ уни мақбул деб ҳисобламаслигини қайд этган.
