"Бойсун баҳори"да 300 килограммгача гўшт пишириладиган тандир намойиш этилди
Бўйи 2 метрдан баланд, эни қарийб 3,5 метрни ташкил этувчи мазкур тандир бир ҳафта давомида моҳир усталар томонидан катта меҳнат ва юқори маҳорат билан бунёд этилди.
Сурхондарё вилоятининг Бойсун туманида ўтказилаётган "Бойсун баҳори" XIII халқаро фольклор фестивали доирасида яна бир эътиборга молик воқеа қайд этилди. Фестиваль меҳмонлари учун бунёд этилган улкан тандир ўзининг ҳажми ва имкониятлари билан ҳақиқий рекорд натижа сифатида эътироф этилмоқда.
Бўйи 2 метрдан баланд, эни қарийб 3,5 метрни ташкил этувчи мазкур тандир бир ҳафта давомида моҳир усталар томонидан катта меҳнат ва юқори маҳорат билан бунёд этилган. Қурилиш жараёнида хавфсизлик, мустаҳкамлик ҳамда сифат масалаларига алоҳида эътибор қаратилган бўлиб, тандир миллий анъаналар ва замонавий ёндашув уйғунлигида барпо этилган.
Ушбу йирик тандирнинг сиғими ҳам эътиборга моликдир — унинг ичида бир вақтнинг ўзида 10-15 та қўзичоқни пишириш мумкин. Пишириш жараёнида кўмирдан эмас, балки анъанавий усул — ўтин ёқиш орқали юқори ҳарорат ҳосил қилинади. Бу эса таомнинг ўзига хос таъми ва хушбўйлигини таъминлайди.
Мутахассисларнинг таъкидлашичаа, тандирда бир марталик пишириш учун 250 килограммдан 300 килограммгача гўшт сарфланади. Тайёрланган тандир гўшти эса фестиваль давомида кенг жамоатчиликка тортиқ этилади.
Энг эътиборлиси, етти кун давом этадиган фестиваль мобайнида ушбу тандирда пиширилган гўшт хориждан келган сайёҳлар, меҳмонлар ҳамда кам таъминланган оилаларга бепул тарқатилиши режалаштирилган. Бу эса нафақат миллий таомларимизни тарғиб қилиш, балки меҳмондўстлик ва саховат анъаналарини яна бир бор намоён этади.
"Бойсун баҳори" фестивали шу тариқа нафақат бой маданий дастурлари, балки ана шундай ноёб ташаббус ва рекорд натижалари билан ҳам йодда қолмоқда.
