Ўзбекистонда маҳаллий туроператорларнинг хориждаги тарғибот харажатларининг бир қисми қопланади
Бунда харажатларнинг 25 фоизигача, бироқ 500 миллион сўмдан ошмаган қисми тўлаб берилади.
Ўзбекистонда туризм соҳасини ривожлантириш ва сайёҳлар учун қулайликларни оширишга қаратилган янги молиявий механизмлар жорий этилади. Бу ҳақда “Ҳуқуқий ахборот” Тelegram-каналида хабар берилди.
Қарорга кўра, 2026 йил 1 сентябрдан Туризмни қўллаб-қувватлаш жамғармаси ҳисобидан Вазирлар Маҳкамаси томонидан белгиланган тартибда бир қатор харажатлар қисман қоплаб берилади.
Хусусан, 2030 йил 31 декабрга қадар Ўзбекистонга туристларни жалб қилиш мақсадида хорижий давлатлардан таклиф этиладиган туроператорлар вакилларининг транспорт, яшаш ва овқатланиш харажатларининг бир қисми тўланади.
Шунингдек, маҳаллий туроператорларнинг хорижий сайёҳлар оқимини оширишга қаратилган хориждаги тарғибот тадбирлари харажатларининг 25 фоизигача, бироқ 500 миллион сўмдан ошмаган қисми қоплаб берилади.
Қарорга мувофиқ, хусусий тадбиркорларнинг сайёҳлар учун маданий-оммавий ва концерт-томоша ҳамда маданий тадбирларни аниқ белгиланган ҳудуд ва жадвал асосида йўлга қўйиш билан боғлиқ харажатларини 1 йилгача муайян қисмини молиялаштириш тартиби жорий этилади.
Бунда тадбиркорлар томонидан ушбу тадбирларни ташкил этишни босқичма-босқич ўзи қоплаш шарти билан молиялаштириш чегараси Туризмни қўллаб-қувватлаш жамғармаси кенгаши томонидан белгиланади.
