Австрия жосуслик гумони билан уч нафар россиялик дипломатни мамлакатдан чиқариб юборди

Австрия ҳукумати дипломатик бинолар томларида жойлашган ва жосуслик мақсадида ишлатилиши эҳтимоли бўлган “антенна ўрмони” сабабли уч нафар россиялик дипломатни персона нон грата деб эълон қилди. Бу ҳақда Reuters хабар берди.

 

Маълум қилинишича, Венада Россия давлатига тегишли бинолар, айниқса дипломатик ходимлар яшайдиган турар жой мажмуаларида ўрнатилган кўплаб спутник антенналари Австриянинг асосий ички разведка хизмати эътиборини узоқ вақтдан бери тортиб келган. Мутасаддилар ушбу ускуналар бошқа давлатларнинг спутник алоқаларини кузатиш ва тинглаш учун ишлатилиши мумкинлигини истисно этмаган.

 

“Дипломатик иммунитетдан жосуслик қилиш мақсадида фойдаланиш мутлақо қабул қилиб бўлмайди”, — деди ташқи ишлар вазири Бит Майнл-Райзингер баёнотида.

 

Унинг таъкидлашича, мазкур уч дипломат аллақачон мамлакатни тарк этган.

 

Шу билан 2020 йилдан буён Австрия томонидан мамлакатдан чиқарилган россиялик дипломатлар сони 14 нафарга етди.

 

Австрия давлат телерадиокомпанияси ушбу уч шахсни элчихона ходимлари сифатида таърифлаган. Ташқи ишлар вазирлиги бу маълумотни тасдиқлаган, аммо батафсил маълумот бермаган.

 

Венадаги Россия элчихонаси бу борада изоҳ бериш сўровига дарҳол жавоб бермади. Бироқ Россиянинг РИА Новости ахборот агентлиги элчихонага таяниб, Москва бу қарорга нисбатан қатъий жавоб қайтаришини маълум қилди.

 

Матбуот анжуманида ушбу ускуналар нима учун хавф туғдириши ҳақида сўралганда, Давлат хавфсизлиги ва разведка бошқармаси раҳбари Силвия Маер уларнинг ҳажми ва хусусияти билан боғлиқлигини айтган, аммо дипломатларни чиқариш вақти ҳақида изоҳ бермаган.

 

Вена халқаро дипломатик марказ ҳисобланиб, у ерда Европада хавфсизлик ва ҳамкорлик ташкилоти (ЕХҲТ) ҳамда Бирлашган Миллатлар Ташкилотига қарашли муассасалар, жумладан, Халқаро атом энергияси агентлиги жойлашган.

 

Россия ва АҚШ каби йирик давлатлар одатда Австрия, ЕХҲТ ва БМТ ташкилотлари учун алоҳида элчилар тайинлайди ва ҳар бири ўз дипломатик миссиясини бошқаради.

 

Иккинчи жаҳон урушидан кейин иттифоқчи давлатлар секторларига бўлинган Вена элчихоналар ва халқаро ташкилотлар кўплиги сабаб узоқ вақтдан буён “жосуслар шаҳри” сифатида ҳам танилган.