АҚШ 48 соат ичида Эроннинг келишув бўйича жавобини кутмоқда
Музокаралар ҳарбий ҳаракатлар бошланганидан бери энг яқин босқичга етди.
Ахiоs хабарига кўра, АҚШ ва Эрон ўртасида ҳарбий ҳаракатларни тўхтатишга қаратилган муҳим келишувга эришиш эҳтимоли ортиб бормоқда.
Манбаларга кўра, томонлар бир саҳифали ўзаро англашув меморандумини имзолашга яқин. Мазкур ҳужжат урушни тўхтатиш ва кейинчалик кенгроқ ядровий музокаралар учун асос яратиши кутилмоқда.
АҚШ расмийлари Эрон томонидан асосий масалалар юзасидан яқин 48 соат ичида жавоб кутмоқда. Таъкидланишича, ҳозирча якуний келишувга эришилмаган бўлсада, томонлар ҳарбий ҳаракатлар бошланганидан буён энг яқин нуқтага келган.
Маълумотларга кўра, меморандум 14 та асосий бандни ўз ичига олади. Улар орасида:
- минтақадаги ҳарбий ҳаракатларни тўхтатиш;
- Ҳормуз бўғозини очиш бўйича 30 кунлик музокараларни бошлаш;
- Эрон томонидан уранни бойитишни вақтинча тўхтатиш;
- юқори даражада бойитилган уранни мамлакатдан олиб чиқиш;
- ядровий қурол ишлаб чиқишдан воз кечиш;
- АҚШ томонидан санкцияларни юмшатиш ва музлатилган маблағларни озод қилиш;
- халқаро, жумладан БМТ текширувларига рухсат бериш каби масалалар мавжуд.
Шунингдек, манбаларга кўра, Доналд Трамп томонидан “Озодлик лойиҳаси” доирасидаги операцияни вақтинча тўхтатиш қарори ҳам музокаралардаги ижобий силжишлар билан боғлиқ.
Музокараларда АҚШнинг махсус вакили Стивен Виткофф ҳамда Жаред Кушнер иштирок этаётгани, жараён тўғридан-тўғри ва воситачилар орқали олиб борилаётгани қайд этилмоқда.
