Венгрия Украинанинг мусодара қилинган пул ва олтинларини қайтаради

Венгрия ҳукумати март ойида Будапештда мусодара қилинган Украина давлат банки — “Ошадбанк”га тегишли пул маблағлари ва олтинларни Киевга қайтарди. Бу ҳақда Украина президенти Володимир Зеленскийга таяниб, DW маълум қилди.

 

Унинг сўзларига кўра, маблағларнинг қайтарилиши икки давлат ўртасидаги муносабатларда “муҳим қадам” бўлган. Зеленский Венгриянинг янги ҳукуматига “конструктив ва сивилизатсиялашган ёндашув” учун миннатдорлик билдирган.

 

Гап 5 март куни Венгрияда ушлаб қолинган икки инкассатор автомобили ҳақида бормоқда. Уларда 40 миллион доллар, 35 миллион евро ҳамда 9 килограмм олтин бўлгани айтилган. Венгрия томони ушбу ҳолат юзасидан пул ювиш гумони билан жиноят иши қўзғатган эди.

 

Расмий Будапешт маълумотига кўра, маблағ ва қимматбаҳо металларнинг ташилиши Украина Хавфсизлик хизмати собиқ генерали ҳамда ҳарбий тажрибага эга бошқа шахслар раҳбарлигида амалга оширилган бўлиши мумкин.

 

“Ошадбанк” эса маблағлар Австриянинг Raiffeisen Bank International билан тузилган халқаро келишув доирасида ташилаётганини билдирган. Украина томони инкассаторларни озод қилиш ва мусодара қилинган активларни қайтаришни талаб қилган.

 

Орадан бир кун ўтиб, қўлга олинган етти нафар инкассатор Украинага қайтарилган. Бироқ Венгрия ҳукумати дастлаб инкассатор автомобилларини қайтаришга тайёрлигини, аммо пул ва олтин топширилмаслигини билдирган эди.

 

Апрель ойида Венгриядаги парламент сайловларидан сўнг Зеленский ушбу масала Венгриянинг “Тиса” партияси раҳбари Петер Мадяр билан муҳокама қилинаётганини маълум қилган. Мазкур сиёсий куч парламент сайловларида энг кўп мандатни қўлга киритган. Мамлакатда 16 йил бош вазирлик қилган Виктор Орбан эса мағлубиятга учраган.