"Ялла" номидаги болалар ансамбли ташкил этилади

Тошкент шаҳридаги 7-сонли болалар мусиқа ва санъат мактабида Ўзбекистон халқ артисти Фаррух Зокиров билан учрашув бўлиб ўтди. Тадбирда мактаб ўқувчилари ва педагоглар иштирок этди.

 

 

Аввалроқ Ўзбекистон Президентининг ПҚ-137-сон қарорига мувофиқ, мазкур таълим муассасасига Фаррух Зокиров номи берилгани маълум қилинган эди.

 

Учрашув давомида иштирокчилар мактаб фаолияти, дарс жараёнлари ва ижодий муҳит билан танишди. Тадбирда маданият вазири Озодбек Назарбеков, вазирнинг биринчи ўринбосари Авазхон Таджиханов ҳамда соҳа вакиллари ҳам қатнашди.

 

 

Тадбир якунида мактабда бадиий-педагогик кенгашнинг биринчи йиғилиши ўтказилиб, ўқув-тарбия жараёнини ривожлантириш ва ёш истеъдодларни қўллаб-қувватлашга қаратилган бир қатор масалалар кўриб чиқилди.

 

 

Жумладан, мактабнинг моддий-техник базасини мустаҳкамлаш, капитал таъмирлаш ишларини жадаллаштириш, Фаррух Зокиров ижодий меросини ноталаштириш ва чоп этиш, шунингдек, “Ялла” номли болалар ансамблини ташкил этиш бўйича таклифлар билдирилди.

 

Бундан ташқари, Ёшлар ижодий лабораторияси ҳамда “устоз-шогирд” анъаналари асосида эстрада йўналиши бўйича ижрочилик маҳорат мактаблари фаолияти йўлга қўйилиши, мактабда ёзги тўгарак ташкил этилиб, ҳудудлардаги болалар мусиқа ва санъат мактабларининг 3 нафардан энг иқтидорли ўқувчиларини мазкур тўгаракка жалб этилиши белгиланди.

 

 

Ёзги тўгаракнинг иқтидорли 5 нафар ўқувчилари ҳамда уларнинг ўқитувчи ва концертмейстерларининг нуфузли халқаро танловларда иштирок этиши билан боғлиқ харажатлар Давлат бюджетидан қопланиши қайд этилди.

 

 

Ёзги тўгаракнинг иқтидорли 5 нафар ўқувчилари ҳамда уларнинг ўқитувчи ва концертмейстерларининг нуфузли халқаро танловларда иштирок этиши билан боғлиқ харажатлар Давлат бюджетидан қопланиши қайд этилди.

 

 

Умумхалқ байрам дастурлари ва юқори даражадаги анжуманларнинг бадиий қисмида Мактаб ва ёзги тўгаракнинг иқтидорли ўқувчилари ҳамда ижодий жамоаларининг иштирок этиши режалаштирилди.