Apple, Google, Meta ва бошқа компанияларнинг Ўзбекистонга қанча солиқ тўлагани маълум қилинди
Электрон хизматлар кўрсатувчи хорижий компаниялар 2026 йилнинг биринчи чорагида 2025 йилнинг мос даврига нисбатан 81 фоизга кўп солиқ тўлаган.
Ўзбекистонда электрон хизматлар кўрсатувчи хорижий компаниялар томонидан тўланган солиқлар ҳажми кескин ошди. Бу ҳақда Солиқ қўмитаси хабар берди.
Маълум қилинишича, 2026 йилнинг биринчи чорагида мамлакатда фаолият юритаётган 89 та хорижий IT ва рақамли сервис компанияси жами 65,7 миллиард сўм солиқ тўлаган. Бу кўрсаткич ўтган йилнинг мос даврига нисбатан 81 фоизга кўп.
Солиқ тушумлари бўйича етакчиликни Apple эгаллади — компания 16,1 миллиард сўм солиқ тўлаган.
Кейинги ўринлардан Google (14,9 млрд сўм) ҳамда Мета (13,9 млрд сўм) жой олди.
Шунингдек, ТОП-10 таликдан Valve Corporation — 8 миллиард сўм, OpenAI — 2,5 миллиард сўм ва Anthropic — 1,5 миллиард сўм солиқ тўлаган компаниялар сифатида ўрин олди.
Рўйхатдан, шунингдек, Мidasbuy(1,3 млрд сўм), TikTok (868,3 млн сўм), Booking.cоm (694,7 млн сўм) ва Netflix (570,4 млн сўм) ҳам жой олган.
Амалдаги тартибга кўра, Ўзбекистонда электрон хизмат кўрсатувчи хорижий юридик шахслар ҳар чоракдан кейинги ойнинг 20-санасидан кечиктирмай солиқ ҳисоботларини топшириши ва солиқларни тўлаши шарт.
