Қозоғистонда вице-президент лавозими жорий этилади: парламент қонун лойиҳасини маъқуллади

Қозоғистон парламенти “Президент тўғрисида”ги конституциявий қонун лойиҳасини биринчи ўқишда маъқуллади. Ҳужжатда мамлакатда вице-президент лавозимини жорий этиш ҳам назарда тутилади. Бу ҳақда informburo.kz хабар берди.

 

Маълум қилинишича, қонун лойиҳаси парламентда адлия вазири Ерлан Сарсембаев томонидан тақдим этилган. Унинг айтишича, ҳужжат 15 март куни қабул қилинган янги Конституцияни амалга ошириш доирасида ишлаб чиқилган.

 

Лойиҳага кўра, вице-президент президент томонидан Қурултой розилиги билан тайинланади. Унинг ваколатлари президентнинг алоҳида ҳужжатлари билан белгиланади.

 

 Вазирнинг таъкидлашича, бу давлат бошқарувини янада мослашувчан ташкил этиш ва амалий вазифаларга тез мослашиш имконини беради. Вице-президент фаолияти эса давлат раҳбари администрацияси томонидан таъминланади.

 

Қайд этилишича, вице-президент президент номидан Қурултой, ҳукумат ва бошқа давлат идоралари билан ишлайди, музокараларда президент вакили сифатида қатнашади. Президент муддатидан олдин лавозимини тарк этган тақдирда эса унинг ваколатлари вице-президентга ўтади.

 

Шунингдек, қонун лойиҳасида президентликнинг бир марталик етти йиллик муддати, давлат раҳбарининг партиясизлиги ҳамда унинг яқин қариндошларига раҳбарлик лавозимларини эгаллашни тақиқлаш нормалари сақлаб қолинган.

 

Шу билан бирга, президент қуйидаги ваколатларга эга бўлади:

 

— “Қазақстан Халқ Кенгеси” таркибини тасдиқлаш;

 

 — Инсон ҳуқуқлари бўйича вакилни тайинлаш; 

 

— Қурултой фаолият юритмаётган даврда қонун мақомига эга фармонлар чиқариш.

 

Қонун лойиҳаси парламент томонидан биринчи ўқишда маъқулланди.