Президент Шавкат Мирзиёев Хотира ва қадрлаш куни муносабати билан табрик йўллади
Табрикда Иккинчи жаҳон урушида иштирок этган ўзбекистонликларнинг фидойилиги ва тарихий ҳиссаси алоҳида қайд этилди.
Президент Шавкат Мирзиёев Ўзбекистон халқини қутлуғ айём — Хотира ва қадрлаш куни ҳамда Иккинчи жаҳон урушида қозонилган буюк ғалабанинг 81 йиллиги муносабати билан самимий муборакбод этди.
Президент ўз табригида жанг майдонларида фашизмга қарши курашган қаҳрамон аждодларимиз хотирасини ёд этиб, бугунги кунда ҳаёт бўлган уруш ва меҳнат фахрийларига юксак ҳурмат ва эҳтиром билдирилишини таъкидлади.
Давлат раҳбари Иккинчи жаҳон уруши даврида ўзбекистонликларнинг фронт ва орқа жабҳалардаги фидойилиги, халқимизнинг инсонпарварлик ва бағрикенглик намунасини кўрсатганини алоҳида қайд этди.
Ушбу йилларда Тошкентда барпо этилган “Ғалаба боғи”, “Хотира нури” ва “Миллат фидойилари” ёдгорлик мажмуалари халқ хотираси ва қадриятларини улуғловчи масканларга айлангани таъкидланди.
Шунингдек, уруш ва меҳнат фахрийларини қўллаб-қувватлаш, уларнинг ижтимоий ҳимоясини кучайтириш бўйича давлат даражасида амалга оширилаётган ишлар давом этаётгани қайд этилди.
Президент бугунги мураккаб даврда тинчлик, барқарорлик, миллатлараро тотувлик ва ҳамжиҳатликни асраш ҳар қачонгидан ҳам муҳим эканини таъкидлади.
Табрик якунида давлат раҳбари барча юртдошларга сиҳат-саломатлик, тинчлик ва фаровонлик тилади ҳамда Хотира ва қадрлаш куни барчага муборак бўлишини билдирди.
