Путин яратган “аждодларга сиғиниш сиёсати” энди унга қарши ишламоқда — WSJ
Украинага қарши уруш давомийлиги Иккинчи жаҳон уришидан ҳам ошиб кетгани Россияда Путинга бўлган ишончни камайтиряпти.
Россия президенти Владимир Путин томонидан йиллар давомида шакллантирилган 9 май ва Иккинчи жаҳон уруши атрофидаги давлат мафкураси энди Кремлнинг ўзига қарши ишлай бошлади. Бу ҳақда The Wall Street Journal'га таяниб, "Униан" ёзмоқда.
Қайд этилишича, Украинага қарши уруш давомийлиги бўйича аллақачон Совет Иттифоқининг 1941–1945 йиллардаги фашистлар Германиясига қарши урушидан ошиб кетган. Шу билан бирга, Украина дронлари Россия ҳудудларига тобора чуқурроқ зарба бермоқда.
WSJ'га кўра, фронтдаги турғунлик, Россия армиясининг катта йўқотишлари, иқтисодий вазиятнинг ёмонлашуви ва мамлакат бўйлаб дрон ҳамда ракета ҳужумлари фонида Россия жамиятида норозилик кайфияти кучаймоқда.
Нашр Путиннинг собиқ нутқ ёзувчиси Аббос Галлямовнинг фикрини келтиради. Унга кўра, Кремль томонидан йиллар давомида тарғиб қилинган “боболарга сиғиниш сиёсати” энди акс таъсир бера бошлаган.
“Шундан бери ҳар бир кун биз боболаримиз хотирасига муносиб эмаслигимиз ҳиссини кучайтирмоқда. Путин мана шу култни яратди ва энди бу унинг ўзига қарши ишламоқда”, — деган Галлямов.
WSJ қайд этишича, Россияда ҳатто уруш тарафдори бўлган айрим миллатчилар ҳам мавжуд вазиятни танқид қила бошлаган.
Жумладан, россиялик медиа вакили Анастасия Кашеварова Телеграмъдаги постида Иккинчи жаҳон уруши қатнашчилари ҳақида гапириб: “Бу пайтга келиб боболаримиз аллақачон Берлинда эди, биз эса ҳануз мушт ўқталиб, ъқизил чизиқларъ ҳақида гапиришда давом этяпмиз”, — деб ёзган.
Нашрга кўра, Украина ҳужумлари Россия ичида хавфсизлик хавотирларини кучайтирмоқда. Энди Россиянинг фронтдан узоқ ҳудудлари ҳам Украина дронлари етиб борадиган ҳудуд сифатида қаралмоқда.
Карнеги маркази эксперти Александр Бауновнинг айтишича, Путин энди аввалгидек “ҳимоячи” ёки “суперқаҳрамон” сифатида қабул қилинмаяпти.
WSJ шунингдек, 9 май паради Кремль учун рамзий босимга айланганини қайд этди. Экспертлар фикрича, хавфсизлик таҳдидларига қарамай, Кремль парадни бекор қила олмайди, чунки 9 май Россияда деярли “муқаддас сиёсий рамз” даражасига кўтарилган.
Маълумот ўрнида, Москвада 9 май парадида ҳарбий қуроллар намойиш қилинмайди. Бу байрам арафасида хавфсизликни таъминлаш чораси сифатида баҳоланмоқда.
