Италиянинг Ўзбекистондаги собиқ элчиси Римда ҳибсга олинди
Собиқ элчи россияликларга ноқонуний виза сотишда айбланмоқда.
Италиянинг Ўзбекистондаги собиқ элчиси Пьергабриэле Пападиа де Боттини ди Сант’Аньезе Рим шаҳрида коррупция ва ноқонуний миграцияга кўмаклашиш айбловлари билан ҳибсга олинди.
Италиянинг “la Repubblica” нашри маълумотига кўра, Рим прокуратураси собиқ дипломатни россиялик фуқаролар учун ноқонуний тарзда узоқ муддатли туристик визалар расмийлаштириш схемасини ташкил этганликда гумон қилмоқда.
Терговчилар фикрича, Пападиа ўз ёрдамчиси Татьяна Тараканова билан биргаликда Шенген ҳудуди талабларига жавоб бермайдиган шахсларга визалар берилишига кўмаклашган. Расмий консуллик йиғими 45–60 евро бўлганига қарамай, ноқонуний визалар учун 4 мингдан 16 минг еврогача маблағ олингани айтилмоқда.
Маълум қилинишича, ушбу схемада Москвадаги бир нечта туроператорлар ҳам иштирок этган. Ҳужжатлар Италиянинг Тошкентдаги элчихонасига юборилган ва айрим мурожаатчилар Ўзбекистонда яшамагани ҳамда консулликка шахсан келмагани қайд этилган.
Суриштирув ишлари 2025 йилда Италия Ташқи ишлар вазирлиги томонидан ўтказилган инспекциядан сўнг бошланган. Текширув давомида виза расмийлаштириш жараёнида кўплаб қоидабузарликлар аниқланган.
Ҳозирда тергов органлари собиқ дипломатга тегишли қиймати қарийб 3 миллион еврога баҳоланаётган мол-мулкларни ҳам ўрганмоқда. Пападиа эса ушбу маблағларни мерос орқали олганини билдирган.
