Эрон АҚШнинг сўнгги таклифига жавобини Покистон орқали етказди
Теҳроннинг таклифи ҳозирча фақат ҳарбий ҳаракатларни тўхтатишга қаратилган.
Эрон АҚШнинг мамлакатга қарши ҳарбий ҳаракатларни тўхтатишга қаратилган сўнгги таклифига оид расмий муносабатини Покистон воситачилари орқали тақдим этди. Бу ҳақда мазкур жараёндан хабардор манбага таяниб, IRNA агентлиги хабар берди.
Манбага кўра, тақдим этилган режа музокараларнинг ҳозирги босқичида, аввало, минтақадаги ҳарбий ҳаракатларни тўхтатишга қаратилган.
Аввалроқ Эрон Ташқи ишлар вазирлиги вакили Теҳрон АҚШ томонидан илгари сурилган таклифларни ички муҳокама ва якуний хулосалардан сўнг расман кўриб чиқишини маълум қилган эди.
Эслатиб ўтамиз, Покистон жорий йилнинг 8 апрель куни Теҳрон ва Вашингтон ўртасида сулҳга эришишда воситачилик қилган. Ушбу жараён АҚШ ва Исроилнинг Эронга қарши қарийб 40 кун давом этган қўшма ҳарбий ҳаракатларини тўхтатишга хизмат қилган.
Шунингдек, Tasnim агентлиги ҳам Эрон Ташқи ишлар вазирлигидаги манбага таяниб, Теҳрон АҚШнинг сўнгги таклифига жавоб берганини тасдиқлаган. Бироқ, жавоб тафсилотлари ҳозирча ошкор қилинмаган.
Anadolu агентлиги маълумотига кўра, Покистон келаси ҳафта АҚШ ва Эрон ўртасидаги музокараларнинг навбатдаги босқичига мезбонлик қилиши мумкин.
