Германия аэропортлари рейслар оммавий бекор қилиниши мумкин
Ёз мавсумида парвозларнинг тўхташи 20 миллион йўловчига таъсир кўрсатиши мумкин.
Германия аэропортлари ассоциацияси мамлакат авиация секторида авиакеросин танқислиги ва нархларнинг кескин ошиши сабабли ёз мавсумида оммавий рейслар бекор қилиниши мумкинлиги ҳақида огоҳлантирди.
Ассоциация раҳбари Ральф Бейзелнинг маълум қилишича, энг оғир сценарийда айрим аэропортлар қуввати 10 фоизгача камайиши мумкин. Бу ҳолат жами 20 миллионга яқин йўловчига таъсир кўрсатиши эҳтимол бор.
Мутахассисларнинг қайд этишича, айниқса арзон авиакомпаниялар ва кам талабга эга сайёҳлик йўналишлари энг кўп зарар кўриши мумкин. Айрим рейслар бутунлай бекор қилиниши ёки қисқартирилиши, бу эса чипталар нархининг ошишига олиб келиши кутилмоқда.
Маълумотларга кўра, керосин нархи сўнгги икки ойдан ортиқ вақт давомида урушдан олдинги даражадан икки баравар юқори бўлиб қолмоқда. Шу сабабли кўплаб авиакомпаниялар мавжуд нархларда парвозларни иқтисодий жиҳатдан амалга ошира олмаслигини билдирмоқда.
Аэропортлар ассоциацияси ҳукуматдан авиация солиғини вақтинча бекор қилиш ёки камайтириш бўйича чора кўришни сўрамоқда.
