Покистонда худкушлик ҳужуми оқибатида 15 нафар полициячи ҳалок бўлди
Террорчилар портловчи моддалар ортилган автомобил билан полиция постига ҳужум уюштирган.
Покистоннинг шимоли-ғарбий қисмида жойлашган Хайбер Пахтунхва вилоятида содир этилган худкушлик ҳужуми оқибатида камида 15 нафар полиция ходими ҳалок бўлди. Бу ҳақда Dawn нашри маҳаллий расмийларга таяниб хабар берди.
Маълум қилинишича, террористлар Банну туманидаги полиция постига портловчи моддалар билан тўлдирилган автомобил ёрдамида ҳужум уюштирган. Кучли портлашдан сўнг ҳужумчилар бир неча йўналишдан ўқ узган.
Ҳудудий полиция вакили Сажжад Хоннинг маълум қилишича, ҳужум вақтида постда жами 18 нафар полиция ходими навбатчилик қилаётган бўлган.
Портлаш оқибатида полиция пости деярли бутунлай вайрон бўлган. Шунингдек, пост ҳудудидаги зирҳли техника йўқ қилинган ва яқин атрофдаги бинолар ҳам жиддий зарар кўрган.
Расмийлар қутқарув ишлари якунланганини билдирган. Ҳозирда ҳудудда хавфсизлик чоралари кучайтирилиб, қўшимча назорат пунктлари ташкил этилган.
