Европа Иттифоқи Толибон вакилларини Брюсселга таклиф қилиши мумкин
ЕИ давлатлари жиноят содир этган мигрантларни Афғонистонга қайтариш имкониятларини кўриб чиқмоқда.
Европа Иттифоқи Афғонистонга мигрантларни қайтариш масаласи бўйича Толибон вакиллари билан Брюсселда музокара ўтказишни режалаштирмоқда. Бу ҳақда AFP агентлигига таяниб, France 24 хабар берди.
Маълум қилинишича, яқин кунларда Кобулга учрашув санасини келишиш учун расмий мактуб юборилади. Музокаралар Швеция билан ҳамкорликда ташкил этилмоқда ва бу Европа амалдорларининг Афғонистонга амалга оширган икки сафаридан кейинги навбатдаги босқич бўлади.
Еврокомиссия вакилига кўра, томонлар ҳозирда Брюсселда Афғонистондаги амалдаги ҳокимият вакиллари билан техник даражадаги учрашув ўтказиш имкониятини муҳокама қилмоқда. Ҳозирча ташрифнинг аниқ санаси белгиланмаган.
Сўнгги йилларда миграция сиёсатини қатъийлаштираётган Европа Иттифоқининг қарийб 20 давлати, айниқса жиноят содир этган мигрантларни Афғонистонга қайтариш имкониятларини кўриб чиқмоқда. Шу мақсадда 2026 йил январь ойида Кобулда техник учрашув ҳам ўтказилган.
Бироқ бундай музокаралар қатор баҳс-мунозараларга сабаб бўлмоқда. Чунки Толибон Европа Иттифоқи томонидан расман тан олинмаган.
Шунга қарамай, Белгия ҳукумати Брюсселга келиши мумкин бўлган Толибон вакилларига махсус рухсат беришга тайёр экани айтилмоқда.
Айни пайтда Афғонистонда оғир гуманитар вазият сақланиб қолмоқда. Халқаро ташкилотлар маълумотига кўра, 2023 йилдан буён беш миллиондан ортиқ афғон Эрон ва Покистондан қайтган бўлиб, уларнинг аксарияти уй-жой ва иш ўрнисиз яшамоқда.
Европа Иттифоқи статистикасида қайд этилишича, 2013–2024 йилларда иттифоқ давлатлари афғон фуқароларидан бир миллионга яқин бошпана сўровларини қабул қилган. 2025 йилда ҳам афғонлар бошпана сўраб мурожаат қилувчилар орасида энг катта улушни ташкил этган.
Бу борада энг фаол давлатлардан бири Германия ҳисобланади. Берлин 2024 йилдан бери жиноий жавобгарликка тортилган 100 дан ортиқ афғонни Қатар воситачилигидаги чартер рейслар орқали депортация қилган.
Мамлакатдаги кайфият сўнгги йилларда афғонлар томонидан содир этилган бир қатор ҳалокатли ҳужумлар, жумладан, ўтган йили Мюнхенда автомобиль билан одамларни босиб кетиш ҳодисасидан кейин янада кескинлашган.
Австрия ҳам шундай йўл тутиб, сентябрь ойи ўрталарида Вена шаҳрида Толибон вакиллари делегациясини қабул қилган.
Белгия ва Швеция каби яна бир қатор Европа Иттифоқи давлатлари ҳам миграцияга қарши қатъий позициядаги сиёсатчилар қўллови остида шу тажрибани такрорлашни кўриб чиқмоқда.
Миграция ҳуқуқлари билан шуғулланувчи ташкилотлар эса афғонларни оғир ижтимоий-иқтисодий вазият ҳукм сураётган мамлакатга қайтариш инсонлар ҳаётига хавф туғдириши мумкинлигидан огоҳлантирмоқда.
